炎明熹（Gigi）早前達成夢想，舉行處女個唱，獲一班忠實粉絲為她舉行電車派對，當中有兩架不同主題的應援電車，一架印有Gigi全新作品《Only For Me》MV靚相的主題電車、另一架是根據MV內出現過的場景而重新佈置的派對電車。Gigi說︰「其實今次係fans club一手一腳安排嘅活動，我會先坐派對電車出發，之後轉坐《Only For Me》電車回程，今次係我第一次坐以自己做主題嘅電車，心情好興奮，不過今日可以參與嘅粉絲人數好有限，希望遲啲可以搞多啲大型聚會，同大家有更多互動，除咗搞音樂會係一個唔錯選擇，之前都有舉行過BBQ，下次可以搞打邊爐，又或者一大班人一齊行山都唔錯，好有氣勢。」
在派對車上，粉絲細心地在車廂內還原多個《Only For Me》MV的場景，當中包括在MV開首出現過的麥皮蟲，原來Gigi對麥皮蟲情有獨鍾，覺得牠們「肥嘟嘟、好得意」，粉絲們更準備了一大盒麥皮蟲送給偶像，Gigi急不及待把麥皮蟲放在手上把玩，還好奇地問如何飼養和餵食。Gigi更向粉絲大爆拍MV的瘀事，由於MV拍攝地方比較荒蕪，拍攝團隊安排了一架附設洗手間的化妝車給Gigi使用，用來補妝和換衫，當時她正準備下車，因為擔心甩裙，最後一個不留神整個人仆在地上，Gigi也忍不住取笑自己太「論盡」。
提到演唱會因颱風關係，只開了一場，事後Gigi曾在社交平台分享感受，坦言並沒有感到失望，反而可以讓自己有更充裕的時間，為補場做更好準備。「暫時補場未知幾時，因為我都要考試，好難分心去準備演唱會事情，甚至日後嘅公開演出，次數都有機會減少，所以補場嘅日子，應該要去到明年。」至於在個唱中長達十多分鐘的跳唱演出，外界一致讚好，有沒有令Gigi燃起做更多跳唱歌曲？她笑言：「我都好想挑戰跳唱，今次嘅演出，對自己嚟講係一個突破，其實跳舞真係好難，唱歌同樣難，所以要好多謝樂隊同跳舞老師們，俾咗好多力量我，希望日後可以拍啲跳舞片俾大家睇。」
