湯怡與師弟楊天宇在劇集《轉角浣紗街》大玩姊弟戀！劇情講述飾演闊太的湯怡，因空虛寂寞，在咖啡店邂逅「小鮮肉」楊天宇，繼而火速撻著。雖然湯怡與楊天宇首次合作便飾演情侶，但他們異口同聲表示零尷尬，湯怡說：「冇諗過我哋可以做到情侶，呢個組合非常新鮮，合作過程，佢俾我感覺好有活力，同佢拍劇好開心。我哋拍親暱戲都冇乜尷尬，以前嘅我可能會有，而家反而冇諗咁多，大家識咗好耐，冇尷尬感覺。」
楊天宇不諱言在公司聚會中經常見到湯怡，又會時常傾偈，所以就算第一次合作拍劇，感覺既不陌生亦不緊張，他說：「今次係輕喜劇，每集十分鐘左右，所以埋位嘅狀態都好輕鬆。」
今次是湯怡榮升人母後首次拍劇，她笑言感覺既熟悉又陌生：「結婚之後有拍過電影，不過就真係有一段時間冇拍劇，好開心拍劇變成me time時間，如果喺屋企，小朋友會比較黐身，而家開工感覺比較relax，不過有時亦會好掛住囡囡，因為囡囡而家識講嘢，每次出門，佢都叫『唔好走』，我惟有同佢解釋媽咪要返工，唔返工冇嘢食，灌輸佢，父母要工作。」