洪卓立（Ken）日前於廣州舉行「說故事的人音樂會」廣州站，這是Ken聲帶受損兩年多後舉行的首個音樂會。音樂會期間發生一段小插曲，其中一首歌曲Ken覺得自己表現失準，即時要求重唱副歌，為了證明自己的狀態，更連續重唱五次副歌，贏得台下觀眾連續掌聲和歡呼，Ken說：「我返嚟啦！」。
音樂會上，Ken感性分享這幾年間發生的事情，聲帶受損、身形暴脹等，「上一次都係喺廣州開音樂會，但因為聲帶問題唱唔到高音，嗰次音樂會嘅所有歌都降咗key，唔係降咗啲，係降咗好多！企喺台上面仲要扮冇嘢，但真係唱得好差，可能有好多朋友喺好遠地方嚟，我嘅表現好對唔住佢哋。落咗台，喉嚨即刻有浸血腥味，第二日完全失聲。」
隨後Ken訪遍中西名醫亦得不到治療方法，直至遇上一位唱歌老師，其獨特的發聲方法令他慢慢找回聲音，聲帶一步步康復，接着是擱置多年的改變身形計劃，「我係有目的咁增磅！不過以前斷斷續續咁做，有時因為懶、有時做一陣就整親條腰，所以今次趁住一個大空檔，就的起心肝去做。」