洪助昇（Aiden）由參加《全民造星II》入行，去年才簽約英皇正式出道，早前慶祝一周年推出新歌，MV中大膽與女主角咀嘴。銀幕要濕吻，原來私底下仍然未獻出過初吻，27歲仔，參加《造星》時仍是A0，之後只談過一場遠距離戀愛，乜都冇做過就分手了！洪助昇說：「A0.5得唔得？我係第一個發明呢樣嘢！之前大家有確認過一齊，純粹Long D physically冇獻出初吻啫！」
保住處子之身，回想《造星》後曾經歷低潮迷惘期，幸好終獲英皇一紙合約，洪助昇仍記得第一次見高層Mani（霍汶希），對方叫他加油，「細路，香港樂壇靠你㗎喇！」打咗支強心針！
去年才正式出道的洪助昇，《憑實力單身》做見面禮，到最近的《單曲循環症》慶祝一周年，他說每次都會將自己的真實經歷交給填詞人。今次MV要與余香凝胞妹余潔滢咀嘴，他說：「《造星》之前其實我都有拍過一啲作品，我已經奉獻咗我嘅螢幕初吻，角色就係角色、Aiden就係Aiden，所以我初吻應該都仲喺度嘅！」
19年參加《造星II》，那時洪助昇說自己是A0，之後原來拍過一場遠距離戀愛，他人在內地、對方在外地，「當時面對面識嘅，識咗之後大家去咗唔同地方各自工作，keep住有聯絡，之後喺電話入面傾得多，產生情愫就一齊咗！當時大家去唔同地方都成年時間，當時有疫情 ，你要去一個地方好難，我覺得唔好再傷害對方，當你好想見一個人，對方亦好想見到你，但都冇得見，同時間又好支持你去做你嘅工作，嗰一刻係大家時間點唔啱，所以我覺得應該要分開！我覺得咁樣對佢有啲唔公平，要對方屈就，雖然佢好支持，但我自己就好理性，覺得應該要分開！」
遠距離戀愛乜都冇做過，洪助昇自封A0.5，「我隨時準備獻出初吻，只不過等一個適合時間、適合嘅人出現，雖然咁講好奇怪，我屋企人都會好擔心，太遲拍拖呢，突然間拍拖你一定好認真，有時太認真會嚇親對方，所以我依家心態都覺得隨緣，你無得計劃！A0.5得唔得？我係第一個發明呢樣嘢，我覺得又唔係唔算，我唔知道對方會唔會睇返，我覺得咁樣係對人哋一種傷害，當時真係有付出過感情，對方亦都付出過，你唔承認嘅時候係好傷心，雖然咁講好似好天真好傻，但我覺得你有鍾意過人就係啦，大家有確認過一齊，純粹大家Long D physically冇獻出初吻啫！」
覺得MC好犀利
《造星II》猛人雲集，MC張天賦、曾比特，一個唱到紅館、一個已經唱到大陸，當年身為大熱進入廿強的洪助昇話，冇得比較咁多，「當時佢哋有問過我，加唔加入一啲男團，但係因為嗰陣公司有合約（太陽娛樂）未完，我之前唱片嘅上司係Paco（黃柏高），我其中一個恩人，我覺得
唔可以因為有一個新機會而忘本，所以我當時堅持留返喺公司，我冇選擇即刻過去ViuTV，直到完咗份合約先至離開。」事出必有因，洪助昇坦言：「雖然咁講好老土，但我相信所有嘢都有原因發生，你問我有冇曾經後悔過唔加入Viu， 一定有，但我會覺得依家公司都對我好好，我覺得所有嘢都係最好嘅安排！」
經幕後導演朋友介紹拍攝軒公張敬軒MV，現場遇上英皇高層Raymond，「一開始見Raymond，後面都有見Mani（霍汶希），我記得第一次係FaceTime見佢，唔多唔少都會有少少緊張，始終佢係一個你由細到大，見到嘅金牌經理人嘅人物，你冇可能唔識佢，當時候Mani講咗句，佢話『細路，加油呀！香港樂壇靠你㗎喇！』你會覺得有一個好相信你嘅人去撐你，佢會燃點咗你把火，甚至係激勵，所以我覺得所有嘢，都係一個幾有趣經歷。」
面對《造星II》戰友，至今仍然有團火，「最friend同P1X3L、MC有時都會私底下見面，Mike（曾比特）就多數工作時候先會見到。我覺得呢一份友情好珍惜，大家喺一個比賽入面一齊成長，依家每次我出作品，Phoebus、George、Marco都會分享，MC都會去聽我嘅作品，我嗰時去睇佢紅館演唱會，佢都有俾飛我，我坐第一排，睇住佢喺前面表演嘅感覺，覺得呢個人真係好犀利，今日已經成為一個獨當一面嘅人，但佢仍然會好記得，當時曾經一齊喺節目度成長嘅朋友。」
兄弟爬山各自努力，洪助昇說公司想他走悲歌王子路線，繼續當一個抒情歌王子，問他行純情處男路線又如何？他笑說：「OK，行純情，呢個可以，但唔好處男啦！」都要繼續保住初吻先！
化妝：Gigi Liu
髮型：Vincent Leung@ii Alchemy Hair and Nail
場地：Mustard Seed Co-Working Space
