洪助昇（Aiden）今日（8日）生日，日前他的Fans為他舉行生日會，更特意將生日會變成「韓式見面會」。Aiden坦言生日會當日比以往緊張，因為很多歌迷在生日會前表示會帶同男朋友前來，「佢哋話要俾我過吓目，唔知點解大家都當咗我係玄學大師，要我幫吓眼。當然如果佢哋兩個都支持我，我會好開心，令到佢哋情侶之間多一項活動，但另一方面又好驚佢哋當我係情敵會打我。」
Aiden表示不太清楚「韓式見面會」是什麼，只知要「坐定定」，他說：「後尾發現原來係佢哋會送一啲好可愛嘅飾物俾我，我要當場戴上。嗰日試咗好多唔同嘅造型，狐狸、公主、香港小姐，其實真係唔知點解會有公主同香港小姐呢兩個造型，最後變咗做BL劇男主角嘅斯文敗類造型，發現大家好鍾意我做斯文敗類。」
問到他最喜歡哪一個造型，他無奈說是「香港小姐」，Aiden說：「其實條斜帶似港姐咋，上面係寫生日快樂㗎。頭上面嗰個其實係王冠，我個人覺得似王子嘅，不過啲同事話似港姐，最緊要大家開心。」另外，玩猜猜畫畫時，其中一條題目是「單身狗」，不過Aiden一時想不起如何畫，於是惟有直接指着自己讓Fans們估答案，誰不知fans們很快便猜中，Aiden說：「都唔知好嬲定好笑。」