楊千嬅剛完成《MY TREE OF LIVE世界巡迴演唱會》多倫多、康州、拉斯維加斯和馬里蘭州四個地方演出，今日又宣布明年2月14至15日於澳門繼續開騷，年初五開第一場，千嬅自言未試過農曆年做騷，「更是情人節，都幾開心，到時會帶同家人到澳門睇騷兼一齊玩。」
至於美加之行，千嬅表示今次是2019年後相隔4年再到美國演出，非常開心很多朋友開幾個鐘車來看她開騷，觀眾的反應熱烈，令她感到很溫暖。「每一場演出都似大型KTV咁，首首歌都大合唱，真係好勁呀班觀眾，好多謝佢哋咁支持。」
此行千嬅帶同媽咪一起出發，工作之餘，盡孝道帶媽咪去食好嘢、又同老公丁子高重遊當年於拉斯維加斯先斬後奏註冊結婚的小教堂，「因為當年註冊，媽咪冇喺現場，我咪講返當時情況，同啲小故事俾佢聽，佢都聽得好開心。」
回想當年同丁子高去旅行期間，突然註冊結婚，那一刻的「勇」，千嬅謂真的改變了自己整個人生：「依家諗返，由一個人變兩個人，再變三個人，人生其實好多嘢，個天都安排好，跟住命運帶俾你嘅流水向前行，你就神奇地行咗個人生出來㗎啦！第日放假，我諗住再帶囝囝嚟，再同佢講當年Daddy、媽咪故事。」
雖然老公繼續做管家，管住千嬅的飲食，但她也吃了這一年最多的澱粉質，回來就要還：「因為之後過年喺澳門開騷，過年你知咁多好嘢食，依家減定，留多啲quota過年嗰陣用，同埋都要保養下把聲，唱咗17場，明年巡迴繼續，要保持一個好體能。」
