梁諾妍（Inez）日前才出Po曬細女Berly原來跟老公洪永城BB時一模一樣的對比照，連同Sir face大女Amber，笑指「一屋洪永城」後，相隔4日才再出Po，於ig限時動態發長文，詳述這幾日「失蹤」原因，將自身經歷好好跟各位媽媽分享，希望不要重蹈她的覆轍。
Inez寫道：「失蹤咗幾日嘅我終於返嚟，我去咗邊？去咗發高燒。星期六晚開始發燒，半夜瘋狂發冷打晒冷震骨痛成日超攰完全唔知發生咩事。星期日（朝）早就燒到39.2，做晒5合1檢測都係全一線very clean，諗嚟諗去都唔知點解，直到一位媽媽朋友話係唔係乳腺炎？omg我星期四同五真係太忙有試過2次過咗7個鐘泵，又因為我量多嘅關係，應該已經塞咗。
「其實右上胸已經痛咗好多日我完全唔為意，星期日持續嘅高燒食退燒藥都冇好到，最後黃昏時間堅辛苦頂唔順去醫院睇急症，姑娘再幫我探熱已經燒到39.7度誇張，醫生睇完右胸又脹又腫又紅又咁高燒，建議我留院3日打抗生素，然後我話我想返屋企，所以當日我抽咗血，睇吓啲菌有冇入血，打咗抗生素針同高燒止痛針。
「昨天（星期一）其實都一直反覆，我努力做晒我可以做嘅，埋身親餵、2、3個鐘泵一次、準時食藥、休得就休、餵前用熱毛巾敷、餵後用凍椰菜敷、食supplements、食得清淡、飲好多水＋通草etc，今朝起身個人終於沒有再發燒發冷，雖然個胸仲係又紅又腫又痛，冇發燒我已經覺得打贏咗一半，因為如果太嚴重要用針抽膿／做手術開個乳頭放膿omg希望冇呢一日。」
Inez緊接着貼上「燒到個人懵咗」的自拍照，繼續表示：「好想好好分享呢個故事，各位媽媽千祈唔好好似我咁，辛苦到唔多識形容，個胸都痛到唔識形容。過來人建議：有得親餵就餵，餵完最好再泵清佢，泵都唔好過4-5個鐘，真係會好易塞，定時要按摩，吃都要吃得清淡啲（我肯定係星期四食完糯米出事）。」