柳影虹本月十二日在大會堂開演唱會，呢段時間密密綵排忙不停，《明周》探班，柳姐專登為讀者送上一曲《少女慈禧》，呢首係柳姐的首本曲，一聽旋律已經諗起佢把靚聲，柳姐話﹕「隔咗六年冇開演唱會，我恨開演唱會恨到發燒，之前成日俾歌迷投訴我唱得唔夠多，今次準備了二十六首，為咗唱多啲，連衫都換少套，希望大家可以聽到心滿意足。」
柳姐的歌迷都等咗好耐，今次一開票房已經爆滿，仲要向會堂申請樓下加位，好多歌迷向唱片公司反應撲唔到門票，四月十七號在沙田大會堂加開一場，依家門票已經賣晒，「真係好多謝歌迷支持，估唔到大家咁捧場，最難得是契仔媽咪朱太（名醫朱建華太太），近年努力支持器官捐贈計劃，今次會邀請三百位器官捐贈者的家人，以及受惠人一齊聽我的演唱會，大家可以共聚同一個場合聽我唱歌，我覺得今次的演唱會好有意義。」
