林峯近日推出全新廣東歌《無傷大雅》，新歌找來吳林峰作曲，林寶填詞。之前因為疫情關係未能夠親身回港拍攝MV，所以這次MV特意找來在電影及劇集合作無間的周秀娜（Chrissie）做女主角，二人飾演在一起很久的情侶，分手後林峯一直默默關心及照顧Chrissie！林峯說：「好有幸可以請到娜姐嚟做我嘅 MV女主角，其實我哋之前有合作過電影、電視劇，但就係冇合作過MV，因為佢都好少拍MV嘅，所以好有幸、好多謝佢今次嘅參與！」今次算是二人第四度合作，問到拍MV可有趣事？林峯笑言：「就係發現原來娜姐好輕，佢真係好鬼Fit！」娜姐亦笑言：「當佢抱起我嘅時候連我都覺得自己好輕，嘩，佢咁輕而易舉嘅！」原本Chrissie好擔心，因為知道拍檔有腳傷在身，擔心自己的體重會令他傷上加傷。林峯立即話 :「呢排我腳傷冇操(體能) 我都覺得你輕，所以你真係好輕！」
首次與吳林峰合作的林峯表示，原來兩人好有淵源：「今次作曲人（吳林峰）係我第一次合作，好多謝佢寫咗呢隻歌比我，係一首好好聽，好襟聽嘅歌。其實我同作曲人都有啲淵源，因為我叫林峯佢叫吳林峰！」Chrissie聽到立即報以幾聲敷衍掌聲，林峯解說：「就係我第一次撞到佢嘅時候，佢話以前自己個名成日都會比人開玩笑，所以佢以前好憎我，我話其實我都明白嘅！我哋一路都好想認識對方，但一直都冇機會，今次機緣巧合之下終於可以合作！」
對於香港樂壇近年急速改變及有許多的新名字冒起，有沒有一些名字希望來年可以合作？林峯表示有留意同公司 (華納) 的新音樂人，「其實無論做演員或者歌手，我哋都希望尋求新嘅突破同火花，無論係幕前定幕後，同唔同嘅人合作我覺得都係一個好好嘅嘗試同學習，但首先我係好想同我公司新嘅音樂人合作。」Chrissie好奇問他可有試過Rap？林峯說：「曾經在節目裏嘗試過，私下去唱歌有時都會挑戰吓，自問唔識但都想嘗試，身邊都有Rapper朋友，我哋公司（rap得嘅）都有MC同Gareth.T（湯令山），其實仲有好多新人都好希望可以合作！」