相隔年半多才出新歌，林奕匡（Phil）說一直都沒有閒着，只是沒有派歌。唱作歌手就是這般低調，正如新歌《台前幕後》，林奕匡覺得其中兩句「寫得好靚」：「台前要高格調 台後要低調」。他說：「作曲本身係一件好悶嘅事，如果作曲要好高調，我每次寫歌就影相話俾大家聽，我日日都po IG啦！」
於加拿大出生成長的林奕匡入行14年，是名牌大學UBC的高材生，從小到大學業上與胞兄看齊，只是他揀了唱歌這條路，如今餅印大佬卻成了科學家，他說：「影響世界，我真係好pround！」林奕匡影響的，選擇從音樂出發，為別人，幫姜濤寫了大熱的《孤獨病》和《Dear My Friend》，他說最想為「阿姜」再寫歌，「令到大家冧爆嘅歌！」為自己，追逐多年未圓的紅館夢！
同樣鬼聲鬼氣，新歌《台前幕後》的MV請來「鬼佬」王敏德特別演出，林奕匡說：「大家知道Michael（王敏德）係一個演員，好多人未必知道佢係一個機師，更加多人未必知道，原來佢係歌手出過專輯，攞過銷量榜冠軍，好多年前出過泰文碟。佢跳舞原來有底子，呢隻歌就show到出嚟，所以搵佢feature呢個MV入面。」說穿了，人人都有「台前幕後」兩個樣，「我最自然嘅狀態，打籃球又好、做運動或者陪太太，甚至我自己即興去寫歌，I just want to write，可以釋放做自己鍾意做嘅嘢，儲個養分之後，再去返台前面對世界，先係一個健康process！」
雖然相隔年半有多才有新作品，但林奕匡其實冇停過，「keep住我都冇離開過香港，keep住都寫歌、寫俾其他朋友，我唔係停咗！」唱作人的幕後生活既低調又悶，他說：「如果作曲要好高調，我每次寫歌就影相話俾大家聽，我作緊歌喇，我日日都po IG啦！有時做音樂係悶悶地，that’s the same with all musicians，一個world class musician點解可以有咁多talent，因為佢每日都要練好多粒鐘，練好多年為台上一分鐘、台下幾多年功。唔使講咁多，當你去到台前，大家會明白，知道你有把握苦功。你講幾多都冇用，出到台前，你有嗰樣嘢，我知；你冇嗰樣嘢，你po咁多嘢做乜？你同人講咁多嘢，咁高調做乜鬼嘢！」
我阿哥真係好叻
為了埋手新project，即使復常可以周圍飛，林奕匡亦留港創作，早前只得太太李靄璣（Rikko）獨自返加國探親。已經三年多沒有見父母的林奕匡說：「掛住佢哋，但係佢哋從來都唔會俾壓力我，我未做好我呢度嘅嘢，我唔想離開香港，但另一方面我都知道，時間係唔會返轉頭，有啲時間，逝去咗就逝去咗，屋企人年紀都愈來愈大，你估我唔想多啲陪佢哋去行山、去體驗呢個世界！佢哋一生都貢獻咗俾我同我哥哥，可以做我哋想做嘅嘢，從來都唔去奢求任何嘢；調轉諗，我要更加做好依家嘅事，我先可以有呢個空間去陪佢哋多啲。」
林奕匡出生於加拿大Nanaimo，9歲搬到人口只有八千的小鎮Qualicum Beach，中學年代已是高材生，以獎學金考入名牌大學UBC，修讀細胞生物學。從小到大，林奕匡的足跡幾乎跟他的餅印阿哥同步，只是林奕匡最終選擇了唱歌，於07年代表溫哥華，回港參加TVB全球華人新秀歌唱大賽，09年正式簽約Sony唱片出道。他的胞兄，今天成了科學家，從事醫學研究，有份研製COVID快測試劑。說起哥哥，林奕匡充滿尊敬與自豪，「佢研究快測，嗰啲vaccine全部都同佢有關，佢做呢啲嘢真係好勁，醫學係影響世界，我真係好proud！如果話林奕匡唔做歌手，會想做乜嘢？當初我都會想行嗰條路（醫學），但唔係你想行就行到，雖然歌手呢條路，都非常之唔容易行，但要去做一個醫學科學家，嘩，真係要好叻，我阿哥就係好叻！」
林氏兩兄弟自小感情深厚，阿哥做乜、細佬就跟住做乜，「我讀細胞生物學、佢讀Bio Chem！某程度上由細到大，佢都好影響到我，佢話鍾意食啲乜嘢，我話我都鍾意；佢唔鍾意飲啲乜嘢，我都麻麻地！大學時候，第一次同佢有啲選擇分歧，當我畢業嘅時候，二十幾歲有好多想法我想闖，我想玩音樂想去闖下呢個世界，明白到要做科學家，博士都係一個minimum，你起碼Postdoc再study上去，先係現今科學家要達到個level，我就要預我讀書讀到三十零歲，冇咗好多青春，我覺得可唔可以試下去行音樂條路，唔得再返去讀過。我問過教授，如果我走咗兩年，再返嚟讀碩士或者博士，會減咗分定加咗分，佢同我講唔係囉，係會加分，因為睇完個世界，你多咗一啲體會，你出咗去返得嚟，證明你有決心去做一件事，應該會做得更加好。我就好放心去行呢個音樂路，估唔到兩年嘅時間，變咗三年四年五年，呢個係最大嘅大話，邊會兩年時間？一別就十幾年！」
叫姜濤take it easy
有後悔過嗎？「我冇後悔過，一定係唱歌唱到老！你問我如果呢一刻我退休，我會做乜嘢？我會返去讀書都唔出奇，我個人本身好鍾意學唔同嘅嘢，好鍾意研究，所以某程度上，其實呢一行（娛樂圈）都係咁，每日做嘅音樂都係新，好多嘢keep住要學要前進，我比較鍾意呢一種挑戰！」
《高山低谷》原來都已經是2014年的事，要超越或再創2.0，林奕匡坦言都有壓力，「當年我去寫《高山低谷》嘅時候，我從來冇諗過要好多人認識，但求希望做到一首自己好滿足嘅歌。有冇想過要去超越呢隻歌，其實幾年前我已經覺得，我同自己講係唔會，有時啲嘢係冇得強求，當你唔去追求嗰件事，可能已經做到，可能我已經寫咗一首，比《高山低谷》更多人認識，或者更受歡迎嘅歌，但可能唔係我唱，可能係我俾其他人去唱。」
的確，林奕匡近兩年默默為他人作嫁衣裳，姜濤的《孤獨病》和《Dear My Friend》、Edan同邱鋒澤的《 一表人才》、還有姚焯菲的《#BFF》，連Jeffrey魏浚笙人生第一首歌《第一個迷》都由他操刀。訪問當日，尚未爆出姜濤與髮型師的緋聞，正值澳洲回來腳又弄傷的時候，叫姜濤做「阿姜」的林奕匡說：「我都有send message俾佢，叫佢take it easy，始終健康重要，佢應該休息時間唔多，最緊要physical and mental health，佢就繼續可以行下去！」何時再為姜濤寫歌？「有機會就會再寫，I am happy寫咗兩隻歌俾佢，佢上次都有同我講，叫我再寫呀！《Dear My Friend》呢隻歌咁傷感，雖然我寫嘅時候唔知佢個故事，我嗰時好純粹就係，我想寫一隻令到所有人喊嘅歌，我覺得佢會deliver到。如果要再寫，我想寫一首冧歌，我覺得有一隻令到大家冧爆嘅歌，我開心啲啦！」
入行十四年的林奕匡，連同為加拿大幫的好友馮允謙都唱上紅館，林奕匡的紅館夢仍未有時間表，「未可以分享，我都希望可以快啲同大家講，我有個show喎！等我做好呢個project，希望at the end有機會可以開到show俾大家！」至於愛情長跑13年、結婚6年的他，生B計劃又有時間表未？「有計劃，但係我唔透露咁多住，希望將來可以同大家分享，我覺得as couple大家要同一個……英文叫做on the same page，我哋不嬲都係！」有B消息應該快過上紅館！
髮型：Kenki@w.work.shop
化妝：CarmenC
造型：Exactly the Sam
服裝：Sandro
