入行多年的林國斌以往經常飾演壞人，但今次在即將上映的電影《不是你不愛你》中，首次挑戰爸爸角色，與男主角陳昊森飾演兩父子。他說：「今次做人老竇，從來都未做過，又唔使打，又唔係做黑社會，之前啲角色做到好厭，唔想拍，今次呢個係新嘅嘗試，都舒服，所以接拍。」
林國斌在戲中飾演大律師，兒子陳昊森一直將台灣籍母親自殺的責任，歸咎於生性風流的他身上，導致二人勢成水火，加上父親決定再婚，陳昊森對林國斌的仇恨更加有增無減，林國斌說：「我個角色唔算係好慈祥嘅爸爸，因為喪偶，想搵過個老婆，但個仔唔鍾意，好反對，做好多反叛嘅嘢出嚟，其實冇對與錯，我想有我自己嘅新生活，佢又好掛住佢阿媽，覺得我害死佢阿媽，所以好憎我。」
做慣大奸角，要在鏡頭前流出真眼淚感動觀眾，林國斌認為有了人生歷練，眼淚自然即call即到，他說：「其實要喊都冇乜嘢，我都幾廿歲，經歷咗咁多嘢，諗番以前唔開心嘅事，培養一吓情緒，就可以喊到出嚟。」林國斌除了好戲外，更與劇中一眾年輕演員打成一片，一起打羽毛球、打籃球，他的籃球技術，絕不遜色「籃球女神」譚旻萱。他說：「我都係年青人嚟㗎，幾廿年前嘛！初初都有啲擔心同佢哋格格不入，會唔會溝通唔到？原來唔係，佢哋都好Nice！」
