香港劍擊代表張家朗近日在東京奧運上贏得男子花劍個人項目金牌，令下周日嘅花劍團體賽都成為全城焦點，而佢其中一位拍檔吳諾弘亦受到唔少港人關注。
吳諾弘
21歲嘅吳諾弘以童星身份最為人熟悉，佢拍攝過唔少TVB劇集，包括《On Call 36小時》、《荃加福祿壽探案》同《四個女仔三個BAR》等，2018年以劍擊指導身份參演《是咁的，法官閣下》。同時吳諾弘小二時亦開始學劍擊、小三開始打學界比賽，小四至小六已經三度蟬聯全港小學學界個人花劍冠軍。
吳諾弘
吳諾弘升中時更考入香港傳統名校拔萃男書院，開始學界比賽生涯，為學校贏過唔少劍擊獎項。吳諾弘讀中五時，考慮到運動員嘅黃金期實在短暫，於是決定休學，加入港隊，成為全職運動員，佢話自己好細個嘅時候已經有成為全職運動員嘅諗法，夢想係參加奧運。佢表示雖然讀書都重要，但運動員生涯好短，所以選擇遲啲再讀書，屋企人亦全力支持。
吳諾弘今年首度代表港隊出戰東京奧運，成為今屆男子花劍團體賽的香港代表之一，團體賽將於8月1日舉行。
圖片來源︰吳諾弘@Instagram
