東京奧運｜大熱一定贏？ 3個爆冷金牌得主

香港隊喺今年東京奧運獲得不少金牌，而新增競技項目更出現不少爆冷金牌得主，令大家各位觀眾睇到都覺得熱血！

女子滑板街式賽金牌：西矢椛

滑板項目係今屆東京奧運新增嘅項目，東奧開幕前有唔少媒體都會介紹一啲熱門潛力冠軍選手，而外界一直認為女子滑板賽金牌嘅人選會係Pamela Rosa、西村碧莉或者係Leticia Bufoni。而最終由年僅13歲，啱啱小學畢業嘅西矢椛奪得金牌，令唔少人驚訝。更令人驚訝嘅係呢個項目得獎選手平均年齡只有大約14歲，令唔少人感嘆Z世代嘅時代已經到來。

女子公路單車金牌：Anna Kiesenhofer

上月底舉行嘅奧運單車項目女子公路賽奧地利車手Anna Kiesenhofer（姬辛賀法）以黑馬姿態爆冷勝出，以超過75秒嘅差距，擊敗原先被睇好嘅前世界冠軍、荷蘭選手Annemiek Van Vleuten（雲露頓），奪得金牌。Annemiek Van Vleuten更一度搞烏龍，留意唔到Anna Kiesenhofer喺自己前面，以為自己奪金。

現年30歲嘅Anna Kiesenhofer曾經係三項同兩項鐵人嘅運動員，後來因為傷患先轉戰單車項目。佢亦曾經喺比利時職業車隊效力，不過佢僅一年後就認定職業方向唔適合自己。Anna Kiesenhofer喺賽後受訪嘅時候，都表示對於自己奪金感到不可思議同難以置信。

女子三項鐵人金牌：Flora Duffy

今屆最令人震驚嘅金牌得主，相信一定有Flora Duff份。Flora Duffy喺鐵人三項女子組賽事中以1小時55分36秒嘅成績奪金，以1分鐘嘅差距擊敗英國選手Georgia Taylor-Brown，為百慕達奪得史上首面奧運金牌。而百慕達係一個島國，全國人口僅約7萬，係史上獲得奧運金牌的人口最少國家／地區。

33歲嘅Flora Duffy參賽嘅時候冇教練，亦都冇自行車技師陪同，訓練全由自己一手包辦。今次係Flora Duffy第四次出戰奧運，以往因各種原因及傷患問題困擾令Flora Duffy無緣得獎。Flora Duffy喺2013年嘅時候不幸患上貧血症，而今次嘅結果令佢終於圓夢。Flora Duffy賽後表示自己由細到大嘅夢想就係成為職業運動員，贏得奧運冠軍，「所有折磨、困苦和淚水都是值得的」。

圖片來源：西矢椛、Anna Kiesenhofer、Flora Duffy@Instagram