由王祖藍主持的綜藝節目《有個閨密叫祖藍》，昨日（1日）播出最後一集，嘉賓是祖藍太太李亞男（Leanne）。最後一集「藍男CP」終極晒冷玩勻所有閨密任務，其間祖藍自爆大女兒Gabby於三歲時已有一米身高。
昨晚還有不少洋蔥位，原來Leanne當年曾忍痛與祖藍分手並飛返加拿大，但最終因按捺不住對祖藍的思念，拋下一切飛返香港，令祖藍大為感動。祖藍說：「嗰時身邊啲人擔心佢學壞，又驚我呃佢，本來佢諗住放低演藝事業返加拿大讀書，嗰時我都話：『我哋唔好一齊喇，勉強冇幸福，無謂令大家同身邊啲人咁痛苦。』結果佢最後竟然自己一個人飛返嚟香港，同番我一齊。」Leanne事後補充謂：「嗰時有諗過返去加拿大讀書就唔再返香港，但自己個心一路好想返香港，一路好掛住我男友，就扚起心肝寫咗封信畀我屋企人，話我一定要返香港去搵我嘅幸福。」
排除萬難的「藍男」在2015年2月14日拉埋天窗，為了送驚喜製作組播放二人當日結婚片段，還要求祖藍重現當年「愛的宣言」。祖藍在為愛妻填詞的《跌落凡間的天使》歌曲襯托下，發表新一輪愛妻宣言：「我以前好容易好火爆，依家畀你感染到我冇晒火。我當初寫《跌》，『是你的聲音在訴說幸運，我盼搏你歡心』，係我心聲嚟。無論娶你有幾辛苦都好，我知道娶到你一生都會幸福，真係喎，依家娶咗你真係每一日都覺得好幸福。嗰時點會諗會生第一個女、第二個女，我哋係不停咁寫緊戀愛歷史，年年都好幸福，所以好多謝你。」Leanne聽完後冧爆回道：「多謝你俾我成為你人生嘅女主角。」
另外「藍男」還大爆「處女黨」不為人知搞笑事，最終祖藍不開名爆料，矛頭直指處女黨其中一名「眼大大」及為人西化的成員：「我有樣嘢好佩服佢，每次我老婆出去同佢傾偈，其實我老婆都冇講過嘢。假如佢哋夜晚七、八點開始分享，可以分享到凌晨三點，中間可能十二點我老婆話不如返屋企先，佢就會：『其實我仲有好多嘢可以講』。到講到（半夜）三點喇，佢就會問我老婆：『係喎，Leanne，你近排點呀？你有冇咩唔開心？』仲可以點啫？眼瞓咯！」
