黃子華及潘燦良主演的舞台劇《最後禮物》，昨晚（22日）於演藝學院展開一連四十場演出，子華演出後，於後台跟一些來支持的好友會面，各人都大讚他是「神」演出，值100分，好看到不得了，子華接受訪時笑言，「神？係呀！我當自己係「神神」（神經個神）哋㗎啦！」子華不敢給予自己太高分數，覺得仍有好大進步空間，「舞台係日日唔同分數，同拍電影唔同，舞台係日日唔一樣，觀眾互動、對手互動、自己狀態，嗰日血壓呀咁，都有影響，係一個好刺激一個活動。」子華每次演出完畢，返回後台總如虛脫一樣，他坦言確是有虛脫的感覺，「基本上做呢個戲，各位鍾意睇人疲倦係好抵睇，我試過綵排後開車返屋企，綵排地方同我屋企距離只需十分鐘車程，但我開咗五分鐘車之後，係攰到喺一條最繁忙街道上面，同自己講：『算啦，掉低架車瞓喺路邊瞓算啦！我頂唔到啦！』後來真係要泊停架車，休息一陣先再開返屋企。」子華續說：「各位觀眾有機會來睇，睇過包你認同係抵攰！哈哈。」
子華演足四十場，每場精力盡耗，該如何保養身體？他透露編劇莊梅岩教他每日只做一件事——做戲！他說：「我打算每晚八點開場，完場十一點幾番屋企，十二點瞓到第日早上七點九囉！咁應該夠休息，然後咪返來開工。」
舞台劇因疫情而延期，潘燦良表示身邊的朋友沒有選擇一個退票，「個個都同我講，死都揸住飛，等到我哋演出嗰日。今日終於見到大家，真心好多謝各位同我哋一齊堅持嘅觀眾。我就識識哋演戲，但唔識講嘢，不如留番俾一個好識講嘅人講，請子華！」黃子華笑說：「識講嘢一啲都唔重要，最重要係識做人。所以我首先多謝楊受成先生先，各位真係唔係講笑，呢個騷停咗六個月，期間舞台屆有好多騷停咗，一停就冇咗，好陰功。要好有實力的人，先至可以係六個月後安排番做番咁多場。所以我代表成個團隊講一句，真係好多謝楊生。呢個戲，我同燦哥排第一、二日，佢已經同我講，呢個戲好勞氣，真係，呢個戲係一啲都唔容易，健康差啲都做唔到，感激成個團隊，我哋合作好愉快，非常感恩有這次機會，感恩大家（觀眾）冇走到，thank you！」
潘燦良覺得之前因疫情煞停演出，算是不幸中大幸，經過半年沉澱，又有新體會，角色深化一一改善。子華每次演出完都體力透支，阿燦認同道：「係呀，呢個戲真係唔簡單，雖然唔係一個人撐起。但主要我同子華，三個鐘戲，由無乜野發展到好激烈兩兄弟之間的爭鬥，真係每次做完都覺得好花功夫同氣力，好勞氣，哈哈。我老婆（蘇玉華）已經搬定張按摩椅出廳俾我，因為每晚我收工返去，都話好攰，佢咪搬定出來等我可以按摩舒緩下。不過同一個咁嘅好團隊合作，同子華對戲，係一件好享受嘅事，再攰都開心。」
