林溥來（Patrick Sir）與關宛珊（Kimmy），於去年4月榮升父母，育有兒子林若嘉（Preemo），一家三口生活幸福。下個月將一歲囝囝Preemo精靈乖萌，長得肥嘟嘟非常可愛。不過，Preemo近日卻在家不慎跌倒，結果到醫院縫針，讓爸媽十分心痛和擔心。
關宛珊昨日在社交網表示，15日大約7時囝囝在家中發生意外：「Preemo戴好頭盔喺木地板爬，爬爬下突然跣手仆親下巴落地，喊到收唔到聲，傷口好似唔深但顎起少少頭又好似好深，老公唔喺屋企返緊工，唯有我要保持冷靜自己幫BB仔止血，按住傷口止咗20分鐘左右，同時避開傷口用冰敷附近嘅位置，BB仔就冇再喊仲笑住玩添……大約8:30老公返到嚟，睇到傷口好大話肯定要聯針，嗰一刻當我聽到Preemo要聯針嘅時候，已經喊咗岀嚟，因為咁細個BB做手術實掙扎得犀利，醫生通常建議全身麻醉……老公跟住建議我先帶BB仔入房瞓覺，岀到嚟佢原來已經打咗好多電話，當中知道原來兒童醫院唔收急症，仲特登搵咗啲資料俾我睇安撫我，知道有機會唔使全身麻醉。同時佢搵咗我哋嘅兒科醫生，佢即時介紹咗另一位兒童外科醫生俾我哋，醫生睇完相同片，話傷口好深一定要聯針，但係好彩係佢話試吓局部麻醉加安排幾個護士撳住BB聯針，亦都預告我哋要狠心忍痛。」
直至晚上約10時，二人就帶Preemo到私家醫院，因疫情關係，他們不能陪囝囝入急症室，關宛珊安慰囝囝道：「所以我哋同Preemo講『一陣入去忍住痛，啪啪兩下就岀返嚟㗎喇，唔使驚㗎～』老公放低得11個月大嘅Preemo喺治療室床上就要離開，4個姑娘撳住BB仔嘅頭、手、腳，用塊布遮實BB仔個樣，喺外面我哋聽到嘅係佢前所未有嘅喊聲，係好驚多過痛嘅大喊聲，真係好心痛！但係喊喊吓冇咗聲嗰吓係仲驚！喊吓停吓，心亂到不停踱步。突然姑娘叫『爸爸入一入嚟』，真係嚇到命都冇！原來只係睇睇聯好嘅傷口～姑娘們同醫生都話Preemo算好乖好配合，聯咗6針都唔算掙扎得好勁，係唔鍾意俾人撳實佢個頭啫～Haha～大約深夜12:30返到屋企，同佢換衫換片再俾支細奶佢飲就即刻瞓咗添。」
關宛珊讚Preemo比他們想像中堅強、勇敢，「真心覺得佢好叻！等攞藥嘅時候，仲好有閒情逸致撩我哋玩，到而家亦都一啖藥唔需要食~冇諗過喺平滑嘅木地板撞親，都要聯針，仲聯成6針咁多~ 我哋一直都有預計，帶大一個男孩子，一定要面對佢整親手腳、聯針、甩骹之類嘅意外，但絶對冇諗過咁快就要經歷~」最後他們又提醒爸媽們要自備快速測試劑，「否則就好似我哋咁，要即時去附近買完再幫BB驗完先可以入治療室。如果唔係BB就要戴住口罩做手術㗎喇！同埋好在幫Preemo買咗保險，許可的話，真係要幫BB買保險呀！」
Patrick Sir今日再更新囝囝的情況，並多謝大家的關心，「好感恩大家咁錫洋蔥頭，紛紛留言鼓勵佢同安撫我哋，令我哋呢對新手父母感受到好多愛！洋蔥頭聯完針已經好好多，傻更更應該都唔知自己受咗傷，因為冇乜痛，唔需要食止痛藥，已經充滿活力同平時一樣無時停。我哋每日都幫佢洗傷口，期望佢下星期五拆線一切順利！再次多謝大家嘅關愛！Preemo同我講話佢會繼續（小心）玩，繼續探索，繼續學習，繼續發放笑彈喎！」
圖片來源：林溥來@Instagram
