張敬軒目前進行《THE NEXT 20 HINSCHEUNG LIVE AROUND THE WORLD》，日前在美國巡迴最後一站，亦是疫情以來的第57場演出。昨日（11日）他與五十人的團隊回港，引來近三百名歌迷到機場抵港大堂接機，為免令太耐冇見他的歌迷失望，軒仔主動走近牆邊跟歌迷傾偈，猶如壁咚情景，場面十分墟冚。
今次演唱會的歌單上，軒仔作了一個特別的編排，將被歌迷、網民譽為十分『蝦人唱』 的神曲《春秋》及2014年演唱會版的《酷愛》連續兩首一齊唱，除了「挑機」自己，同時亦作為自己的一個考試：「以下呢兩首歌，我啲friend話一定要喺卡拉ok飲大咗幾杯先至夠膽唱，我有時諗，我咁夠膽今晚喺近一萬人面前將呢兩首歌拼埋唱，我都應該係飲大咗！印象中未試過喺演唱會將呢兩首歌拼埋一齊唱，今晚一口氣送俾呢兩首《春秋》、《酷愛》，thank you。」
期間，台下又有歌迷大叫他「除衫」，軒仔隨即望向台下，「你哋睇佢寫咩，『除衫，我有錢。』我最憎就係啲人用錢嚟『撻』我！你有幾多錢呀？嚟台底傾。」引得全場大笑。軒仔續說：「我話晒今年都四張幾，你哋有冇咁鍾意睇一個中年男人除衫呀？返去睇你老竇除咪一樣，哈哈。不過咁，我呢，keep得好好，晚晚返去都有磨砂，又搽吓我代言嘅護膚品、食吓啲supplement，咁真係滑啲。」
軒仔與台下的歌迷握手，不過發生了小插曲，事緣他跟台前歌迷握手，誤以為歌迷手上的袋是送給自己的禮物，於是二人便上演了一幕「搶袋戲碼」，搞到他忍不住笑說：「所以你哋啲禮物呢！一定要話清楚俾我聽，啱啱我去到嗰度握手，有個女仔同我握手，佢舉住一個白色布袋，我以為係佢送俾我嘅禮物，我死搶，跟住佢唔俾我，我諗我都算係第一個喺台上搶歌迷財物嘅歌手，哈哈。」演出過後，場館負責人向張敬軒送上香檳，除了大讚其演出，更表明期待他下次的美國巡迴，十分窩心。