容祖兒（Joey）昨日將演唱會《My Secret Live: ANOTHER SIDE 》放上大銀幕，她謝票時開心宣布下星期會加開場次，好讓未能買到飛的朋友可以買飛入場感受這次的演出，香港以外，澳門亦會上映。
為答謝觀眾熱烈支持，Joey昨日與導演彭秀慧開展馬拉松式謝票，一共跑了八場，令觀眾非常開心，而每場的觀眾亦勁興奮及投入，很多歌迷都跟祖兒召喚，跟Joey一起穿上「閃閃令Dress Code」，戲院之中不時出現全場燈海及大合唱，儼如再開大型演唱會一樣，令Joey十分感動。
對於把演唱會搬上大銀幕，Joey自己座上看回自己，感覺很夢幻及興奮，「IMAX的銀幕很大，第一次見到一個超巨形自己，被謂放大一百倍，真係要多謝我媽咪，因為我見唔到自己毛孔，哈哈。雖然我睇剪片好多次，之前又自己人場睇過，但係今日再睇，發現咁大個銀幕，真係咩都無所遁形，好多細節係今日先睇到，例如自己流晒汗，件衫背脊濕晒….睇到自己每一首歌都好用心去唱，去演釋，沒有辜負34場的觀眾，真係自己都想讚下自己。見到觀眾咁鐘意今次演出，睇得咁開心，又好感動好開心。（有觀眾話等你憑呢部戲角遂金像影后）哈哈….呢方面我邊敢強求，我呢個票房毒藥可以令到戲院Full House ，已經可以寫係我人生記事簿上面，有一個非常好嘅回憶啦，如果可以有提名咁我都開心，可以試下行金像獎個紅地氈係咩滋味嘛，哈哈。」此外，不少歌迷都問她何日再開演唱會，Joey指今年澳門還有幾場，更計劃於2025年舉辦大型演唱會。
