黃智雯今日為無綫新劇《香港奇案》進行外景拍攝，月初突然與珠寶集團高層男友詹文天（Anthony）宣布結婚後，首次露面的她心情靚爆，問到結婚一事，「剛從英國返嚟幾日，今次我們去咗兩星期，其實唔係度蜜月，因為呢個旅行係一早安排好，其實每次去旅行我都當係度蜜月。（突然閃婚？）都唔算突然，因為年頭已經喺紐西蘭完成註冊，但只有我哋兩個去，之後回來同屋企及朋友食飯，處理好再同大家去分享。」至於註冊時可有感動？「好感動呀！但拍戲就只係拍戲，無諗過真正發生係會感動，但詳情細節就唔講咁多，留返俾我哋自己。」她表示暫時未能享受二人世界，因要完成手頭工作，又要為年尾胡說八道會演唱會練舞。
對於即將約滿無綫，她表示仍在商討中，但老公十分支持自己繼續工作，「合約仲有，份約仲有幾耐就唔講喇，但所有嘢一直傾緊，有新動向會同大家講。老公知我事業心重，鍾意做嘢，旅行時我都會都同佢講有關工作嘅事，所以我唔會放棄或減少演出，不過身邊就多一份力量支持自己。」
