無綫新劇《妳不是她》昨晚（29日）的劇情講述因車禍缺勤多時的林信（丁子朗飾），遭公司死對頭Louis（張頴康飾）趁「病」打劫，搶去朱古力大Project之餘，更獲分配推廣滯銷多時的田七水保健飲品。為幫男友阿信化解危機，夏莉（馮盈盈飾）懇求阿信好友阿Man（黃庭鋒飾）幫忙；心軟的阿Man最終與大隻佬進行連場體能Battle、為阿信爭取Gym Room推廣攤位，包括舉鐵、引體上升及推鐵。該場絕對是庭鋒Solo作，不但出賽前脫去上衣狂晒超級麒麟臂及朱古力腹肌，劇組透露所有舉鐵場口，庭鋒更是動用100%真力氣上陣，其中一幕推鐵場口，更拍得庭鋒的汗水大大滴滴在地上，一度谷至額頭現青筋。
庭鋒坦言該場戲絕冇「揸流攤」，舉的全是真鐵，但由於拍攝時間緊密，劇組為其安全着想，亦盡量以最少時間完成拍攝。問到拍攝相關場口前有否力谷，庭鋒坦言全程只有兩星期時間左右準備，除了節食還要找健身教練「加操」：「因為對手係真教練，真係唔係講笑，好彩自己有事先係咁操，所以頂得住。」庭鋒飾演的阿Man雖然看似花弗，但其實一直鍾情夏莉，只是礙於夏莉選擇了阿信決定忍痛讓愛。問到庭鋒最後會否與丁丁拗手瓜爭盈盈，庭鋒搞笑地大賣關子：「係咪真係三角戀呢？要觀眾自己慢慢睇落去再評價。我覺得呢個角色都幾立體，表面好花弗，但內心空虛寂寞之餘又成日好掙扎，之後仲會做啲傻事咁。」飾演丁丁死黨的庭鋒，更獲不少網民盛讚顏值高兼保養得宜，指他雖比丁丁年長9年，但二人飾演同班同學卻完全沒有違和感。問到庭鋒有什麼保養秘訣，他笑言：「呢樣嘢冇得唔歸功於我阿媽，我有個生得好後生嘅阿媽，個樣完全唔似真實年紀，我覺得呢樣嘢真係遺傳。另外我每日都會做面膜保濕，因為乾燥會有紋，上鏡冇咁好。」
