噚晚ViuTV播出《大叔的愛》嘅劇情講到田田（呂爵安飾）喺屋企發現婚紗單張，更幻想同KK一齊著婚紗嘅畫面，令觀眾勁「驚」喜。
Edan噚日喺IG upload一連串婚紗照，著上低胸婚紗嘅Edan變身「肌肉新娘」，擺出唔同pose，留言「小田子要嫁人了」，自嘲自己應該係世上最核突同最摟打嘅新娘，仲問大家想唔想娶佢？最後又表達自己對《大叔的愛》大結局嘅不捨，唔少網民都留言話俾Edan啲相嚇親，講笑話成個婚紗業俾Edan搞彎晒。
點擊即睇《大叔的愛》精采片段
平時形象Man爆嘅黃德斌著婚紗成為網民熱話，網絡上更出現咗唔同用黃德斌婚紗相做嘅meme， 唔怪之得黃德斌話自己拍《大叔的愛》嘅時候唔敢睇playback。《大叔的愛》今晚就大結局喇，預告入面田田同KK齊著禮服行禮，而阿牧就哭訴自己未放低阿田，究竟呢個三角關係結局係點呢？今晚就會知道！
圖片來源：ViuTV、呂爵安＠Instagram
