林欣彤（Mag）最近推出新歌《告訴我》，故事內容原來是承接上一首歌《鐵樹》，她分享道：「《鐵樹》係講分咗手要自強、要學習自愛、點樣企返起身療傷，亦都要寬恕啦，咁而《告訴我》其實係想講等候，等候緊究竟離別咗，放低嗰一個係唔係上帝預備咗其實佢係啱嘅人，但係錯嘅時間呢？如果係，咁又有冇得彌補呢？」
Mag拍攝《告訴我》MV時數度感動落淚，她坦言沒有預計過，「我係喊咗好幾次，同埋因為個妝其實係自己化，所以我就唔想耽誤大家太多時間，如果啲眼淚整花咗個妝又要嘥哂好多時間執，跟住我就忍住，嗰個喺好真誠嘅自己表達咗喺個MV度。」Mag原本拍攝時有一個落水畫面，卻因為突然改動而刪去，令她感覺很感恩，「當日拍到凌晨三點嘅時候係有一個落水嘅（畫面），但係最後因為場地嘅問題就用唔到水，咁我就好感恩呢件事，因為件事容易好多啦，我亦都唔洗冒住會冷親嘅危機啦！亦都好開心（拍MV）成個過程我都覺得係好Enjoyable，同埋大家都好peaceful、好joyful咁拍攝，我係好感恩。」
Mag近年的作品《飛》、《不怕》、《你是我的家》都有份參與創作或幕後製作，接下來會否有更多自己的作品面世呢？她表示：「近年係我寫嘢產量最多嘅一年，不過有部分都唔知幾時出，哈哈，不過我好Enjoy嗰個過程，我亦都好感恩，因為我當接收咗好多神嘅愛同治癒之後，我發現創作能力係大大提升，今年我寫咗好多歌，曲詞都有！」編（曲）方面我都嘗試緊，最有把握嘅係我之前都有份參與人聲部分嘅編曲，《告訴我》都有份參與嘅就係人聲上我會一齊編（曲），會有我自己嘅Idea，至於今年我自己寫咗好多嘅歌裏面嘗試喺demo嘅樂器部分試下編曲，我都搵到好多樂趣同埋學到好多野，都好開心有多一個渠道去表達自己嗰一首歌想表達嘅情緒同意境、內容！」
另外，她也很樂意為其他歌手作曲，「其實我有某幾首歌，我係諗住幾個歌手朋友寫，以前我有一首歌都係諗住一個歌手朋友寫，咁都出咗㗎啦，但係喺我自己唱返就係《Da Di Da》，我係諗住陳慧敏寫嘅，都搵咗佢一齊拍MV同唱和音啦，而有啲歌我係諗住我某啲好朋友，純粹係當一份禮物咁送俾佢哋。」
