從美國回港發展的樂壇新人張天穎Jaime，既是獨立唱作歌手，亦是女子組合Beanies成員，出道未夠一年，已被品牌邀請到巴黎時裝周演出；去年開騷，連關淑怡都現身支持，Jaime似乎來頭不少。
樣子甜美又細細粒的Jaime，經常以短裙仔跳舞拍片，新歌更以校服look宣傳，是新一代「少男殺手」，雖然被指與黃心穎「撞樣」，但Jaime不太在意，更笑說對方身材比自己Sexy好多！
剛剛出道一年的Jaime，日前推出了今年首支solo單曲《1 step at a time》，身兼曲、詞、編、監的她，曾在美國修讀音樂工程學位，回港後在一間音樂學校做marketing，可是Jaime說自己不是一位稱職的打工仔，她說：「返工時成日都諗住點作歌，一有時間就拍唱歌片上網，後來參與『陳輝陽X女聲合唱』的作曲比賽贏咗冠軍，直到參加英皇舉辦的《冤枉新秀訓練營》，要不時唱歌跳舞拍戲，才發覺自己都幾鍾意幕前，就開始自資出第一首歌。」
Jaime於去年已推出了三首歌，分別是講愛情的《Fallen 4 U》、與followers互動的《No Money No Honey》及一段關於小時候不開心經歷的《OK Sure》，她說每首歌都投資了五至六字數字，「現在都有正職和教班，但在美國的時候，我做過media consultant，其實當時賺得最多錢，亦儲了些錢，返到香港好好彩遇到合作的人都好支持，好似今次MV導演都只收友情價，我同佢哋講，如果有日搵到錢，一定會還。」
為了慳錢，Jaime把屋企改裝成studio，「有時造歌可以喺屋企，叫做慳咗少少。」在香港做獨立歌手要一腳踢，歌曲上架、約訪問宣傳都難不倒Jaime，去年終於有機會在麥花臣開騷，與孫曉賢、張進翹及顧定軒舉行《BlackOut Live》，竟然吸引了關淑怡到場，Jaime說：「無想過關淑怡會來睇騷，見到真人時真係好驚訝！」
今年Jaime又被邀到巴黎參與時裝周表演，為三個本地品牌演唱，她特別揀選三首膾炙人口的廣東歌《青春常駐》、《終生美麗》及《失戀太少》宣揚廣東歌；而本月9日，又以女子組合Beanies身份開騷，Jaime希望將來能舉行一個屬於自己的音樂會，「但係要再勤力啲，作多好多歌先開一個concert。」
Jaime出道後，被不少網民指與黃心穎「撞樣」，她笑說：「我覺得……身材就唔似，佢sexy好多，其實我初初唔覺，係人哋覺得似，不過阿爸阿媽話最似係佢哋囉！最搞笑係Beanies在2月14日出歌，當日有個留言話『黃心穎出歌呀』，我心諗又俾人話似黃心穎啦！點知我哋真係同日出歌，好好笑。」問Jaime有沒有聽過黃心穎的新歌？她說：「我聽過兩、三次，未可以評論住，等我聽多幾次先，不過，我覺得佢咁樣講返件事好醒目，把自己放在這個定位，我覺得佢已經放低咗一啲嘢，that’s good for her，佢應該跨過咗先做到這件事。」
出道之後，Jaime被揭曾與男子組合P1X3L成員吳啟洋Phoebus拍拖，以前兩人經常在IG發布跳舞短片，她說：「我哋現在只係好朋友，其實認識咗好耐，返到香港有位歌手朋友出歌，他做MV男主角，咁啱我到場咪做咗朋友囉。」嗱，Jaime話冇認過拍拖㗎！
