彭秀慧（Kearen）早前帶着她執導的電影《阿媽有咗第二個》到捷克布拉格及杜拜出席當地舉行的亞洲電影節（Filmasia）。近年參與過不少外國電影節，也獲得不少獎項的Kearen坦言每次將電影帶去外國，都會十分好奇外國觀眾的反應：「啲笑位佢哋都會笑嘅時候，你就會覺得好開心。最特別係有兩個觀眾由維也納飛過嚟，因為知道呢邊有個電影節，同埋佢哋真係好恨睇港產片，亦都好想睇《阿媽》，所以佢哋更加會過嚟睇。」
至於杜拜，則出乎她意料地出現很多香港觀眾，反應比香港觀眾更熱情：「因為係第一次有港產片喺喺杜拜戲院入面放映，所以好多都係特登嚟支持，佢哋反應好激烈，甚至比起香港觀眾更加熱情。」最令她印象深刻是於當地居住多年的香港人跟她說於電影中看到香港的地方，十分掛念：「例如有觀眾講：『嘩！我見返茶餐廳，真係好熟悉，好想即刻返去香港。』我覺得呢樣係電影好獨有嘅嘢，尤其是即將會消失嘅地方或者文化嘅時候，如果我可以用電影保留住，通過電影帶俾唔同國家嘅朋友，我覺得係影展最有意思嘅地方。」
對於觀眾的提問及感受，Kearen亦十分觸動，她表示：「覺得好似無論去到世界各地邊一度都好，都有香港人嘅存在，我哋每一個香港人都好想、好努力咁樣將香港嘅文化，例如一套電影，當中無論香港嘅地方、藝人，可以推廣俾其他國家嘅人，我諗呢樣嘢對我嚟講真係好深刻。」