無綫才藝比拼節目《全城一叮》昨（13日）晚播出的一集，除了劉家聰戰勝重病歸來，場面催淚外，是晚表現最精采的，是黃紫恩（Jojo）及劉展霆（Eden）表演性感歌舞《春．風》，Jojo化身性感女Miss以緊身衫、黑絲、絲襪帶上陣，孖穿上校服的Eden大跳辣身舞，柔軟度十足的Jojo，全程動作俐落，起身踎低瞓地均郁動自如的她，一招「雙腳360度大迴環」技驚四座；Eden則大曬高難度Breaking及蜈蚣彈，兩人強勁Energy引爆全場尖叫聲，最終成功晉級。伍詠薇看畢大讚：「兩個都好性感，配合得好有化學作用，我特別鍾意Eden。」蔡一傑則笑指Jojo似孫耀威：「唔好以為戴個假髮就認唔到你！」
四、五歲便開始學跳爵士舞的Jojo，舞齡長達十數年，自然有番咁上下功架。Jojo受訪時自爆其實曾因找不到拍檔一度想過退賽，幸好後來在公司偶遇Eden，對方一口答應跟她組隊，Jojo笑謂：「嗰時都唔識佢，識咗5分鐘就決定一齊組隊！」提到舞蹈中有不少遭Eden抬高抬低的高難度動作，Jojo表示給予對方無限信任：「佢話自己好大力，仲話點樣都唔會俾我跌親，呢幾個月佢真係冇整跌過我一次，好多謝佢。」
Jojo為賽事與Eden苦練了足足三星期，不但晚晚練到凌晨不夠瞓，更練到一對腳滿是瘀青，觸目驚心。兩人除了是跳舞拍檔，亦是「湯水密友」，Jojo笑言：「我哋成日夜晚9點練到凌晨3、4點，所以嗰段時間個人有啲虧，媽咪就煲咗啲湯水俾我滋補，我有同Eden Share，隔日佢嫲嫲又煲番啲靚湯俾我，感覺到大家嘅屋企都好支持。」
