李幸倪（Gin Lee）今年第三首派台作品《企好》，回歸拿手情歌，作曲、監製皆由徐浩主理，黃偉文（Wyman）填詞，組成一個全新的組合。
Gin表示在等待曲詞期間，既期待又興奮，當終於聽到demo，已經十分喜歡，收到詞後，直言：「唔！好中呀！好多句歌詞一睇到就會有感覺。」她對Wyman的一個八字訣「記住挺直腰骨企好」尤為難忘，「我覺得呢八個字好有畫面，好多時我哋遇到一啲挫折、唔開心，失戀又好、工作或家庭有問題，好多時都會垂頭喪氣，但希望大家聽到呢首歌可以互相鼓勵，見字企好；聽到呢首歌就要挺直腰骨，我哋一齊撐落去，同時要珍惜、關心眼前人。」
Gin帶着複雜的心情錄歌，第一段就如跟閨蜜談天、安慰着她；第二段則來個大反轉，所有的「你」都變成「我」，原來這都是Wyman的一點小心思，Gin解構：「我哋好多時候識得去安慰人，係因為我哋親身經歷過，知道嗰種嘅痛，因此會有個同埋心喺度。所以唱verse 2嘅時候，就會有『我』，喺安慰人嘅時候不知不覺自己都講得好激動，跟住就將自己嘅經歷一輪嘴咁講晒出嚟。」
Gin這次在MV裏挑戰演技，透露已多年未有拍攝含有劇情的MV，而這次的角色面對多種複雜的情緒，所以拍攝前幾天已經開始緊張，「要表達到女主角經歷嘅痛苦，佢嘅不捨，佢好鍾意對方，但係要放低，佢掙扎面對嘅委屈、背叛。為咗呢場戲，我都緊張咗幾日。琴晚真係有認真思考呢個角色嘅背景，同埋如果我要經歷呢樣嘢，我會有乜嘢嘅心情。」一切準備就緒，MV第一個鏡頭就是拍攝這場戲，Gin亦早有準備，「都擔心自己入唔入到戲，好彩呢排我好鍾意聽一首歌，一聽就會令到我有好多嘅感覺、情緒，所以今朝拍呢場戲前我再聽呢首歌去攞番個感覺，就可以投入到個情緒裏面。」
此外，她又特別感謝MV中三位的演員王敏奕（Venus）、陸駿光及盧鎮業，特別是Venus，原來Venus特意縮短假期改機票遷就拍攝期，Venus表示：「首先因為覺得呢首歌好好聽，我睇咗個故仔之後，覺得呢個MV好empowering，我好想成為呢個角色，所以好想有機會參與呢個MV。」
