張敬軒獻唱《迷失表參道》和《Yes & No》穿上露左邊手臂的黑色有花邊設計的上衣，他在多謝來自五個界別的排舞師時，也提到因為穿這件襯衣而要脫「加拿大」的毛，觀眾即報以如雷掌聲，他說：「估唔到脫毛都有掌聲，是屋企姐姐幫我剃毛，搵到她煮早餐以外的用途，佢仲擔心會令我受傷，但我沒有，我以為過咗40，新陳代謝會慢咗，點知長得好快，噚晚返到屋企佢瞓咗，我自己補咗幾刀，點知刮損了。」軒仔提到見到台下好多女神，當中有娜姐和七師傅，仲話屋企樓下保安都讚七師傅正，有fans大聲叫軒仔咀她，又舉燈牌叫佢哋結婚，軒仔說：「疫情規矩係唔可以結婚㗎！下世啦！」然後面向七師傅說：「下世我投胎要做你老公！」然後擰歪面說大吉利市，仲話紅館成日令人講錯嘢。
演唱會第一場軒仔邀請了Kelly陳慧琳做嘉賓，他特地從升降機落台請Kelly上來，Kelly說：「好耐冇見，上次你請我做你的演唱會嘉賓係3年前，你人緣係咪唔好，冇乜friend，請嚟請去都係我。」軒仔表示因為喜歡她，「我終於有得講，我細細個就聽你啲歌。」Kelly即啋一聲！「你早出道，你首《誰願放手》記錄咗我十月芥菜、情竇初開。」Kelly話嘉賓好八卦，想知邊個放手先？軒仔表示大家都願意放手，Kelly說：「你話我嚟想同我唱《紀念日》我諗極都諗唔到我哋有咩值得紀念，今日嚟到見到你個樣終於諗到，你個樣好dry，首歌是我同Dry馮德倫和Mark 合唱的，你呢棵聖誕樹好dry。」Kelly又說因為在ig看到軒仔姐姐煮的早餐，想問姐姐可否介紹個同鄉給她，因為吃這些早餐愈食愈瘦，軒仔說「我介紹我阿媽俾你就可以，嗰啲英泥、水泥早餐食咗好似冇食，用各種豆搞成糊狀，啲阿媽去到某啲年紀就鍾意搞啲糊狀。」Kelly笑說：「驚你冇牙！」軒仔說天后真係好風趣。
