晚宴於夜晚九點開始，由BOY’Z為婚宴擔任司儀，一上到台關智斌（Kenny）就話：「好感動呀，因為大家都係同阿嬌一齊成長，今日見到佢真係好感動。」然後就播放二人早前喺美國pre wedding片段。播完片後，現場小提琴奏出Westlife嘅《Beautiful In White》，新娘子阿嬌由楊受成帶領入場，全場歡呼聲及掌聲四起。
當二人行到台前，楊受成將阿嬌交俾賴弘國，一對新人喺台上致辭，阿嬌邊喊邊話：「好感謝上天俾我遇到所有愛我嘅人、多謝公司十八年嚟咁照顧我、幫助我。多謝老闆楊博士同埋我經理人Mani，我都想同我媽咪、公公（老爺）、婆婆（奶奶）說，以後我跟國（老公）一齊孝順你們，謝謝！」隨後，老公賴弘國亦都向大家致謝，「感謝大家來到這個地方，見證我們幸福的時刻，然後我特別感動，也特別感謝我老婆的公司英皇對於我們的幫忙。」然後對住台下嘅嬌媽話：「放心把女兒交給我。」場面既浪漫又感人。
之後工作人員就推出祖兒同阿Sa送俾新娘子高1.9米、價值二十四萬嘅結婚蛋糕，蛋糕外形似足哈爾移動城堡，切完蛋糕後，BOY’Z就叫容祖兒同阿Sa就上台講吓蛋糕背後嘅心思，點知祖兒一上台就話：「我想話俾你聽你老公俾到你嘅嘢，我哋都俾到！」阿嬌笑住問：「係咩？真係㗎？」張致恆（Steven）: 「祖兒，攞出嚟得嗎？」祖兒秒回並指住蛋糕：「攞左啦！」阿嬌甜笑話收到大家嘅愛，呢份愛永遠在心中。
之後就到楊受成博士上台致辭：「多謝各位親友，你地今日蒞臨Michael 同阿嬌嘅大喜日子，我向呢度祝福佢地百年好合，永結同心，幸福快樂。但我希望佢地唔好連生貴子，因為阿嬌大左肚呢，就做唔到嘢，因為對英皇娛樂嚟講，佢係其中一個最揾錢嘅artiste。」企喺隔離嘅阿Sa就插嘴:「金蛋呀！」阿Sa話：「我幫佢頂住先！」阿嬌聽到就好精靈咁講：「即係幫我大住肚先係咪？」阿Sa爆笑回應：「幫你做住嘢先呀！」
