上月中《歡樂今宵》舉行聯歡晚宴，很多久違了的老友記聚首一堂，那張全體大合照，很重要。魏綺清特別由加拿大返港，她說，上一次出席是16年聚會，兩次都是擔任晚會司儀，「其實係想同啲舊同事見下面，我好鍾意修哥（胡楓），我成日都同佢WhatsApp，希望趁機會見下佢老人家。」魏綺清說，很多人都不在了，像譚炳文、余子明，「連祝文君都走咗！」
今年56歲的魏綺清，闊別熒幕多年，想當年中學畢業已被發掘當模特兒，之後考入商台做DJ，一頭長髮配上兩個可愛小酒窩，有電台「白兔仔」綽號。成為明星DJ後，出碟出書拍劇拍電影撈埋電視主持，卻忽然在94年移民加拿大，魏綺清說是「隱居」，在小鎮過着平靜安穩的人妻人母生活，每日像活在動物園，火雞、土狼、浣熊老是常出現。
在加國照顧家庭之餘，魏綺清亦在電台開咪，到了20年初，她原先打算退休，因為一個疫情，令她想留住一把聲音，做多一點，「同事都退晒休，我啲年紀都應該退，點知疫情開始，我聽到聽眾打電話嚟喊，嗰時未有疫苗，成家人中晒，唔知點算好！」於是魏綺清找了不少藝人朋友錄音打氣，「好似羅蘭姐話，總會打贏佢！」
這次返來，月底又回去，不過魏綺清說，正有回流香港計劃，「呢度話晒都係自己成長地方，以前我走，因為我覺得二十幾歲，去另外一個地方，開始另外一個生活，我要build up自己家庭，依家差唔多過一段落，我可以返番嚟，做一啲貢獻社會事，唔係話要搵錢，我意思係可以將幫加拿大華人嘅心，都可以返嚟做一啲嘢！」她說：「我賣緊樓㗎喇嗰邊！」由打算退休到計劃回流，或多或少都與這一年間，魏綺清經歷了多位身邊親友的離開，其中她的姊夫、胞兄和母親都在一年間先後告別。喪親之痛的魏綺清，生活仍得繼續，覺得時日無多，想再做多一點點。
「白兔仔」都有傷心時，當年賣牙膏廣告「鹹得有道理」的魏綺清，嘗過五味人生，不只鹹，甜苦都有道理。
由《香港早晨》踩到《歡樂今宵》
《歡樂今宵》是藝人和觀眾的集體回憶。魏綺清說起與她同期的老友記多的是，「有陳敏兒、智叔（廖啟智），修哥、李龍基、Lisa姐（汪明荃）、李司棋、夏雨……我聯絡得最多係鄧英敏同修哥！」
雖然魏綺清在《歡樂今宵》的日子只有一年多，但她當時負責的一個環節叫《你知道我在等你嗎？》，可說是《尋人記》原型，教她很感動，「幫人搵失散親人，唯一《EYT》呢個部分唔係搞笑，好認真做。我試過幫一個阿婆搵佢個仔，佢搵咗廿幾年，耐唔耐就喺樓下坐，希望個仔會返嚟搵佢，後來佢個仔嘅朋友聯絡我哋，話知道佢個仔下落，原來佢個仔刻意離開屋企，十幾歲就離開，令到爸爸媽媽傷心咗好多年。佢媽媽話起碼知道個仔健在，有自己家庭，雖然喺大陸唔會再見到佢，但佢話了咗件心事，好過佢完全唔知生定死！有好多呢啲故事，我做呢個環節做得好投入。」
當時魏綺清朝早要做《香港早晨》、夜晚再做《歡樂今宵》，百足咁多爪，「我又part time做緊港台，又幫飛圖唱片做音樂網主持，嗰時一個人做好多嘢，有時又寫下書。無綫開台同收台嘅直播節目，我都有份，朝早四、五點鐘返工，六點鐘對稿化妝，六點半就on air，踩到九點食早餐，跟住對第二日稿，對完之後我就準備《EYT》綵排；後來有一次我揸車過海，我喺海底隧道差唔多瞓着覺，我知道我好危險；我又試過朝早返工，龍翔道有啲飛仔踩行油追住我，你諗下凌晨四點幾，佢哋以為我出嚟玩，其實我係返工！試過好多次呢啲情況，我就覺得好辛苦，不如做返電台啦，嗰時無綫又約滿，我咪返去港台！」由朝踩到晚雖然辛苦，不過她笑言：「我爆騷爆得好緊要呀！冇人知！」
成日被人認錯係陳秀珠
魏綺清畢業於香港培道中學，讀預科前已被星探發掘當兼職模特兒，拍過多個廣告，其中「獅王鹹味牙膏」廣告中一句「鹹得有道理」最為人熟悉。商科畢業走去投考商台DJ，魏綺清說是無心插柳柳成蔭，「有一次拍完廣告聽到收音機話請人，五千人報名打算請兩個。佢要錄條聲帶，我就求其錄，我就話，我行出街成日有人叫我簽名，但我係一個冇人識嘅人，原來佢哋以為我係一個TVB電視藝員。我話，如果你都想知佢哋叫我咩名，你就要見下我喇！」結果，真的獲得面試機會。
至於她被認錯為的TVB電視藝人，原來是那時候主持《K-100》的陳秀珠。魏綺清笑說：「我諗髮型似啩！不過佢靚我好多！」面試當日，一對七，魏綺清面對陳少寶、樂仕、朱明鋭和盧業瑂等，「我好記得陳小寶同我講，如果你想靠入電台，做踏腳石入娛樂圈，你就唔使諗，我哋唔會咁容易俾一個人，冇實力就出到位，跟住佢再話，不過咁，以你咁嘅樣唔係靚，如果你選港姐，我包保你一世都可以拎住一個落選港姐名銜！我嗰陣唔知道佢哋特登，喺一個唔友善情況之下，要睇你個反應！」結果，竟獲得第二輪面試機會。
商台同事眼紅刮花架車
獲台長樂仕接見受聘，魏綺清更被他改了一個綽號「白兔仔」，「我細路女紮住兩條辮，嗰時電台升降機超慢，我哋唔搭升降機，佢可能成日見到我條辮fing下fing下走上走落，改咗我個名叫白兔仔，有個綽號俾人易記啲，胡啟榮就叫做青蛙王子。」
魏綺清的DJ生涯都像升降機升得很快，「好好彩做咗三個月，俾咗個prime time（黃金時段）我做，同鍾保羅做《年青人時間》，年尾我就攞咗最有前途新人獎。」魏綺清說，「攞咗仲死！因為搶咗好多人機會，我知道有人hard feeling，但係當時我同自己講，長江後浪推前浪，今日我推咗你啫，我唔好意思、我唔想，但係他日，人哋都會推我啫！」複雜的電台人事，魏綺清不懂面對，「始終一個細路女，人事唔識handle，人哋單打你，我又唔識點樣做。有一單，其實我可以報警，但我冇報到警。我記得有一次，因為我做凌晨節目做到半夜兩點鐘，我好眼瞓，我架車仔擺咗喺電台，我坐的士返屋企，六點鐘返番電台，架車俾人刮到花晒，由頭尾後面到車頂，每一塊都俾人刮花，嗰時冇CCTV，有人懷疑係邊個，我唔好講啦，我只諗一樣嘢，點解有人會刮花我架車？一定有個人憎得我好緊要，要刮花我架車發洩！我就算啦，我同自己講，我要做得再好啲！我覺得，欠你嘅就呢一世都係欠你嘅！」
後記：
郭富城
魏綺清是明星DJ，最當紅的年代更出碟做埋歌星，87年推出EP《初戀故事》，翌年再推出大碟《尋夢園》。《初戀故事》內的一曲《戀愛密探》，MV男主角是郭富城。
拍MV前，魏綺清已和城城拍過廣告，「我好早期同佢拍過報紙廣告，我唔係main talent，佢都唔係，我哋兩個做伴舞，有人嚟教我哋跳舞，嗰時我有跟吳景麗學緊跳舞，所以我pick up得快啲，於是我教返大家，我教郭富城加埋羅慧娟。第一次見佢，我覺得呢個男仔好犀利，跳舞好快，佢pick up得好快，及後冇見咁多年，到拍呢個MV嘅時候，佢已經完全超越晒，係一個專業舞蹈員。我覺得每個人，成長路線都唔同，之後佢隻歌《我是不是該安靜的走開》，我嗰時喺電台成日都有播。」
場地提供：Arcadia
