阿嬌鍾欣潼同老公賴弘國（Michael）今日喺尖沙咀進行簽紙註冊儀式，二人宣讀完誓辭準備交換結婚戒指同情深一吻之際，好友祖兒隨即大叫：「好嘢！錫多啖，錫唔夠喎。」
一對新人錫錫後就正式開始簽紙儀式，英皇集團主席楊受成及賴弘國父親分別做阿嬌同賴弘國嘅証婚人；簽紙後四人合照，經理人Mani話：「楊生，挨近啲影相啦。」楊生笑說：「我驚Michael嬲呀。」一眾英皇藝人見氣氛熱烈便趁機起哄：「我唔捨得你嫁呀！」阿嬌還擊：「我好想你哋嫁呀！」祖兒接着說：「嫁出去嘅水等如潑出去嘅女。」心水清嘅阿Sa即刻篤爆，「係咪講錯嘢呀？好似係嫁出去嘅女等如潑出去嘅水喎。」阿sa金句一出，全場笑聲不斷。
隨後，眾人移師室內向長輩斟茶，二人首先跪地向老闆楊受成斟茶，並由祖兒客串「大妗姐」，飲過茶後，老闆就向賴弘國「訓話」：「你要好好對佢（阿嬌），對佢唔好嘅話，你就唔好番嚟香港。」眾人聽畢又再次笑得合不攏嘴，簽紙註冊儀式在一片笑聲中完成。
部分圖片來源：容祖兒@Instagram