張振朗今年都算係黑仔王，自從去年平安夜「飛來橫禍」，行街時突然被從天而降的三個大型帳篷擊中，傷及腰背膝蓋要送院治療，原本擔心會影響新劇《包青天再起風雲》的拍攝，因為飾演展昭的他有大量動作場面，雖然無咩大影響，但點知剛剛隻腳好返，轉頭又到雙手受傷，原來早前於橫店拍攝劇集《包青天再起風雲》外景，經過連續三十日拍打戲，令左右手受傷，手臂上仲有明顯血印，雙手仲無咩感覺，返到香港就即刻睇醫生，他說：「自從在內地拍足三十日打戲，左右手好似一對分房瞓夫妻一樣，我有我用力，佢有佢繼續無力，完全唔理大家感受，返來香港終於有時間去睇物理治療，我仲望住隻手叫佢唔好再鬧情緒，乖乖地！」他表示在國內拍攝期間，為了劇中角色要去學騎馬，點知墮馬四次，搞到手、背都傷晒，為了演好「展昭」！唯有頂硬上！
