賀歲港產片《飯戲攻心2》已於二月九日公映，至今已衝破2,500萬票房，榮登今年賀歲片票房冠軍！當中「飯團」二嫂Monica鄧麗欣（Stephy）夥拍表弟Hugh Hugh何啟華（阿Dee），在年初八到商場出席《龍年人人得米》宣傳活動，與觀眾近距離接觸，大玩有獎遊戲、派發有福米以及簽開光postcard兼合照，謝票之餘與廣大市民延續賀年歡樂氣氛。
Stephy先講到跟以往一樣過年，她開心分享：「都有打下牌 、食年糕同埋帶媽咪去外地玩。近近地去咗台灣旅遊，因為疫情咁多年媽咪都未有出去玩，都係去食下嘢熱鬧下，感受氣氛。」阿Dee則講到：「我都係去親戚朋友屋企拜年，終於約到兄弟一齊瘋狂打機，人大咗少咗打機
難得Lokman、Alton得閒可以一齊玩。」Stephy補充：「有日都約咗肥仔打麻雀，佢牌章幾好，又鍾意打台灣牌，睇中佢數番好快，但就唔係幾好彩輸咗俾我。」
再講到《飯戲攻心2 》上映一周已衝破2,500萬票房，問到兩位如何派福利時，Stephy指：「之前已經講過，上次女仔大派福利，今次要交俾男士們。」阿Dee即場指：「派住飛吻先，好有幸參與已經好開心，知道粉絲想我好似Jeffrey喺戲中咁淋濕身，我可以喺佢隔籬幫佢補水，成班一齊淋佢。」
談及今次拍攝趣事，Dee講到：「其實今次有Jeffrey一齊拍攝係喺好開心，佢永遠衝出嚟想有人笑佢，但更開心嘅係有幸加入呢個大家庭，係件意想不到嘅事。」Stephy同指多謝這位「表弟」的加入，並說道：「今次拍攝趣事感動位都好多，大家經過第一集都好似一家人，相處好融洽、溫暖，每日都非常之熱鬧，雖然拍攝當時好熱好辛苦但好開心。」重提首集解究Stephy真人是不是同樣喜歡食雞屁股，她笑言：「其實我本身都怕，但拍個晚又夜又有少少餓，食食下又唔覺得好差，雖然有少少騷味但都接受到。拍《飯戲1》個陣同阿聰拍時，我已經成日質佢食叉燒，cut 機佢都有吐出來，好搞笑。」
