李幸倪（Gin Lee）今年推出首支派台作品《Dum Dum》後，橫掃五大流行音樂排行榜冠軍位置。而早前推出今年第三首歌曲《企好》亦成為五台冠軍歌曲，令Gin成為今年首位擁有兩首五台冠軍歌曲的歌手！得知好消息後，fans亦為Gin送上驚喜慶祝。當日唱片公司叫Gin回公司開會，其實fans已在公司準備好氣球及蛋糕，待Gin一踏出𨋢門後，眾fans一擁而上兼歡呼：「恭喜阿Gin第二首五台冠軍歌《企好》，Yeah！」Gin興奮說：「好多謝fans club俾呢個surprise我，thank you。我呢首歌可以攞到咁好嘅成績，第二首五台冠軍，你哋嘅功勞好大好大！多謝你哋嘅支持！加油！」她表示聽到同事提到自己是今年第一位有兩首五台冠軍歌曲的歌手，絕對是一個很好的成績，是對歌手很大的鼓勵，她亦將功勞歸功於團隊，「呢個好成績對於我成個團隊，無論係唱片公司嘅同事、成個製作音樂或者MV班底嘅團隊，同埋咁多fans支持我，先有咁好嘅成績，所以我覺得好開心，同埋係一個好大動力。」
問到如何答謝fans，Gin透露現時正積極籌備官方歌迷會，希望十月可以正式成立，「最大原因係我好想凝聚呢班咁錫我嘅朋友，我亦都好錫佢哋，希望嚟緊有更多嘅機會可以近距離見到面。除咗會繼續做多啲好歌答謝佢哋，都希望可以同佢哋一齊做多啲公益活動、唔同嘅互動，一齊成長。」問到會否開show報答？Gin表示已很多人問她幾時開show，其實她已跟公司計劃好，不過希望儲更多歌再舉辦，雖然有點佛系，不過她說會兌現承諾，只是時間問題，「我唔想太快做呢件事，因為想儲多啲新歌。現階段嘅我無論心態、整個歌路，各方面都有一個好大嘅轉變，我想儲多啲呢一個階段嘅我嘅歌，時機啱嘅時候，演唱會就會發生。大家，等我！」