最近推出了自傳《方丈尋根記》的劉以達，今年農曆年過得特別充實，新一年最想買返個figure送俾自己，達哥說：「食返餐好啦！我冇乜特別嗜好，不過有個figure想買，但係好貴囉，睇下買唔買到！類似DC cosmic嗰啲，有Batman呀，人咁高一比一咁高！」另外還有一個願望，「口罩令唔使，就正喇！」
方丈輩份高，達哥說通常是親友到他家拜年，「多數啲人去我屋企，我輩份咁高，比我輩份高嗰啲呢，都上晒天堂，我冇理由上天堂搵佢㗎！」家住林村的達哥，說到過年氣氛，當年今日分別好大，「好多都好難忘，但係已經好多年前，唔記得咗；記得嗰啲呢，我記得都好孤獨㗎，尤其是呢幾年，唔係呢幾年，我諗十年啦，因為香港，因為我住嗰個地方呢，如果農曆年，年初一至年十五，都好熱鬧㗎我屋企，我就住喺嗰啲熱鬧地方，但係呢兩年就水靜鵝飛，完全好似死城咁，有喪屍出現咁，夜晚都有啲燈嘅，但係冇人，好恐怖㗎！」不過達哥都說，走過呢三年「軟禁期」，希望今年會好，「今年好啲喇，放寬咗咁多！」
愛香港的達哥，更加不忘寄語香港人，「恭祝你哋，特別係香港人，好快回復正常，以前搵錢搵得多嘅行業，搵得更加多錢，大家更加開心、更加平安快樂！」誠達哥貴言呀！
