日前，張敬軒、Gin Lee李幸倪、泳兒（Vincy）、黃明德（Dark）、黎展峯（Andy）及洪助昇（Aiden）等，齊齊到海洋公園出席《EEG電笠人人和音校園巡演》，劉若寶（Polly）擔任當晚MC，活動邀請了南區七間中學學生及一些低收入家庭入場欣賞演出，目的是希望透過歌手分享自身經歷，鼓勵學生積極面對問題及認識自己，面對疑難時，總會有方法解決及抒發的途徑。
六位歌手除了唱歌，更與觀眾大玩遊戲，台下觀眾反應熱烈。壓軸出場的軒仔除了唱出《隱形遊樂場》及《青春告別式》，更帶來小手信送給現場觀眾，「今年我發行咗一款月曆，有我嘅玉照。」隨即引來全場起哄，而站在軒仔身旁的Vincy出奇不意一句：「係咪着泳衣㗎？」觀眾又再次嗌爆場館，而其中一位參賽者乘勢追問軒仔：「我想問吓你著泳衣條數幾時找？」全場大聲歡呼，軒仔回應：「咁多人記得㗎咩？我話俾你聽我操緊呀真係！」
去到問答環節，有學生問軒仔，自己於社交平台跟人嗌交，但其實他只是想表達自己真正觀點，卻被人攻擊，十分激氣，軒仔認為social media已經是我們生活的一部分，是一個讓人發表意見的地方，「每一個人都有自己觀點、有自己想講說話，只要唔係好傷害到人，我覺得應該要互相尊重。我覺得學識去聽人哋說話，或者接納人哋意見、學識思考，就算佢講嗰樣嘢唔係自己所認同，都要嘗試去認識，『哦！原來呢個世界有啲人係咁樣諗嘢㗎喎』。我覺得對自己嘅修為、對自己智慧嘅增長，都係一個有好嘅提升。」他更分享解決自己不開心的方法就是幫助別人，「好多小行為、好多善事，你都可以嘗試去做，因為你發現原來喺幫人哋過程當中，可以療癒到自己，『勿以善小而不為』，你對你鄰居、對屋企人、對身邊同事、朋友，伸出你嘅援手，你會發現原來自己嘅價值就係喺嗰啲地方體現，而唔係發幾多脾氣、喺網上鬧人，所以希望大家同我都一樣喺日常生活當中、喺呢個修羅場裏面，好好提升自己智慧，搵到一個屬於自己嘅遊樂場。」
Gin當晚唱出新歌《Diff.》及《企好》，兩首歌曲亦十分正能量，Gin認為聽歌是一個很好抒發負能量的方法，有學生問到因為自己想成為YouTuber，但父母想他找一些比較踏實的工作，令他十分懊惱，Gin隨即分享自身經歷，「鍾意同擅長係兩樣嘢。如果十個有九個人都話你唱歌好叻，咁就有好大可能你係唱歌好叻，如果你好鍾意唱歌，但得一個人話『嗯……都可以吖』，咁你就要諗一樣嘢，係咪未必啱自己呢？』她續說：「好似我想做歌手，一個我好尊敬嘅一位音樂人同我講：『你唔應該做歌手，如果你要做歌手，就唔該你廢咗你全身嘅武功，重新學過啦』，嘩！呢一個feedback來自我一個好尊敬嘅音樂人，我聽到嘅時候傷心咗好幾日。我好想去證明我得或者唔得，所以我透過自己努力去搵答案，俾個時限自己，如果做到嘅話，咁我就搵到個答案；如果試咗好一段時間都未得，我又要再諗一諗，呢條路係咪啱自己呢？呢條路其實係好漫長，需要好多毅力、堅持、耐性，當你想放棄嘅時候，你再諗返起你嘅初心。」
另外，有學生問到，自己經常被誤會「好寸」，其實只是不想說話，但又不想解釋，問應該怎樣做。Vincy即道：「好似講緊我咁嘅？」原來泳兒入行初期都遇過這情況，「有啲人認識咗我之後，同我講返，以為我好有距離，但識咗我之後，原來我都唔係真係咁寸，我又覺得幾好，因為當對方深入了解咗你之後就會有個反差。所以我覺得你唔需要去解釋，唔一定個個人都鍾意你，最緊要係你嘅心態，只要你自己覺得，其實我個人係唔寸嘅，已經好足夠，唔需要迎合別人，做返自己。」而Andy及Aiden則表示，會透過做運動來紓緩壓力，Dark感到有壓力時便會寫歌，在歌曲中表達一切。
