姜濤昨日（30日）在新加坡度過25歲生日，並為MIRROR今天在當地的巡唱《MIRROR FEEL THE PASSION CONCERT TOUR 2024》作準備，不過他早前特別製作了第15胎《好得太過份》已於生日天推出，送給一眾Fans。
過去姜濤聽過很多Fans對他默默付出的故事，其中一個印象特別深刻，「我聽過一個故事，有個Fans Keep住舉牌，但因為大家都舉住牌佢見唔到我，但佢覺得好值得，仲話見唔到我唔緊要，最重要係我要見到佢舉住嗰個牌，令我安心。呢件事大家聽完，連工作人員都覺得想像唔到。」所以他在去年的演唱會上，拍下自己舉應援燈牌的短片，回想那次拍攝，姜濤道：「大家見Fans出Event舉牌好似好容易、一瞬間嘅事情，都唔係好辛苦，但佢哋為咗舉牌呢個行動，可能要付出好多時間，提前去排隊，又拎住咁多嘢，但佢哋只係想話俾你聽佢哋喺度嘅時候。喺安靜嗰一排，我就係諗咗好多呢啲嘢，然後好想話俾大家聽，你哋對我太好喇，真係好得好過份，好感激佢哋由以前到依家，無論我發生乜嘢事情，經歷咗乜嘢低谷，佢哋都會喺度。」新歌亦因此而誕生。
今次拍攝MV時，姜濤拿來大量Fans寄給他的信件作為道具，他表示其實很喜歡收到Fans的來信：「不嬲都鼓勵Fans寫信俾我，唔使嘥太多錢去送好多禮物俾我，因為你哋寫信俾我，我已經接收到你哋內心嘅想法，呢個重要過禮物。」被問到當中可有一些內容十分深刻？姜濤說：「令我印象好深刻嘅有太多，好似前幾日都睇到一封，佢話佢係單親媽咪，帶住幾個小朋友，唔知依家點做，只可以去聽我嘅歌去支撐住佢。我唔知自己嘅歌可以有咁大力量，去支撐住人哋，但如果你可以喺我嘅歌入面攞到力量就已經好足夠。希望大家聽完《好得太過份》，可以俾你哋有一個好好嘅力量，呢個係我對Fans嘅感情，但係你都可以透過呢隻歌，話俾你好重要嘅人知：你都對我好好。」
