昨晚（09/05），衛志豪與一眾《伙記辦大事》演員亮相《開心大綜藝》，宣傳劇集兼慶祝母親節，他又在IG的限時動態貼上現場情況，並留言「準備中」，豈料有網民回應指節目「好娘」，並附上哈哈笑的emoji，又傳MIRROR的演唱會照片，取笑道：「你們節目太老土，阿婆都唔睇。」衛志豪感覺被挑釁，馬上質問對方用意，直指對方不懂尊重別人，字裏行間充滿怒氣，該網民未料衛志豪有此反應，立即道歉。
可是，衛志豪怒氣未消，之後在IG寫下千字文，並分享對話截圖讓大家評理，表示：「本來噚日母親節過得好開心，我都唔想咁嬲，但呢位先生唔知點解係都要撩我，我真係忍唔住，你唔delete啲對話，我都冇咁嬲，你delete即係你覺得唔啱數，最憎啲人講過嘅嘢唔算數，答咗你咁耐，最後話可能send錯，咁我唯有講出黎等大家平下理，如果我有錯，我可以公開道歉。我係IG度post我自己嘢，同你又唔係好熟，我唔知你send呢啲說話俾我係咩意思‥‥‥我唔知我個post有咩得罪你，你以咩身份同我講呢返啲話？你可以話我演技差、口才唔好或者樣衰都得，但你唔可以抹煞一個節目成功與否，每樣嘢都有人鍾意有人唔鍾意，你唔鍾意想叫想認同你？個節目我都有份做，你想我俾咩反應你，成個節目嘅人都係我朋友！」
衛志豪在《開心大綜藝》現場看到表演嘉賓用心準備，卻換來不尊重，替他們不值，「我今日母親節冇同阿媽慶祝，專誠為《伙計辦大事》上《開心大綜藝》做嘉賓，同香港嘅觀眾一齊慶祝母親節，我覺得係榮幸同埋責任嚟嘅，我哋嗰部分短短幾分鐘嘅嘢，都排咗兩日，更何況一班表演嘅小朋友同埋四位上台又唱又跳嘅媽咪，我都唔知佢哋排咗幾耐！仲未計台前幕後同埋幾位司儀！仲有就係，原本我冇親眼見到我都唔信，一位冇份演出嘅高層，我兩日綵排都見到佢一早企左喺度，喺現場，睇綵排俾意見，最後走嗰隻，佢之前睇咗幾多晚我就唔知啦！」
衛志豪表示不認識MIRROR，但對他們深感佩服，「我唔會評價人哋演唱會好唔好睇，但我知道做一個演唱會真係唔容易，我以前跟過郭富城、劉德華、陳奕迅、譚詠麟、張學友、黎明、等等去做無數次演唱會全程報道採訪！我會尊重所有表演者，因為我知道每一個都付出好多！我唔認識呢班後生仔，佢哋都唔會識我，但我都佩服佢哋！祝演出成功！」
另外，MIRROR演唱會尚未完結，今日便傳出喜訊，指花姐已替MIRROR入紙申請明年初的紅館檔期，未知經此事件，衛志豪可會被邀請觀看MIRROR紅館騷，讓大家認識認識？
部分圖片來源：衛志豪@Instagram