Advertisement

「貼地女神」同網民開拖 衛詩雅︰自己做自己打手囉!│封面故事

亞洲
2024.03.29
撰文:劉家倫攝影:Matt Yau

衛詩雅(Michelle)不同其他電影女明星,她比較「斜槓」,既拍YouTube、又玩TG group與八千幾人吹水,甚至會主動搲角色,「基本上知道有導演開戲,我好多時都會厚住面皮地打去問『有冇角色啱我呀?』好多導演都好好,會俾機會我。」

whatsapp-image-2024-03-28-at-15-07-51-10

做藝人,表面風光,收入不穩定, Michelle直言︰「初入行時候都算幾好,中間其實經歷咗一段好難行嘅時候,收入好唔穩定呀,唔知應該點做,好迷惘,好彩我真係鍾意演戲,我會為呢個興趣而繼續堅持行落去。」沒有收入,只能向公司墊支,「一路都還緊(錢)㗎,哈哈!因為我哋簽約係有預付合約金,慢慢還,應該可以還到八十歲,我諗我會同時間做其他嘢,好似拍吓YouTube,但演員這條路就唔會變。」

whatsapp-image-2024-03-28-at-15-07-51-4

Michelle是「連登」常客,最近因為家燕姐認錯她是連詩雅,恭錯喜,又再佔據「連登」帖文,她說︰「我前兩日上去睇,見到有人話我剪短頭髮carry唔到,呢啲濕濕碎,如果IG留言話我,我會撳返入佢account,睇吓佢個樣係點囉!」

有辣有唔辣,與其他電影女明星更不同的是,衛詩雅很貼地,自發功創出一條血路。自一九年開始,Michelle經營個人YouTube頻道《衛食攻略》講飲講食,現在已擁逾十九萬followers,這位女明星最吸客的,不是服裝手袋,而是砂煲罌罉。關於「貼地」,Michelle笑說︰「我冇升過上天,一直都貼住個地。我有嘗試過,但係我扮唔到(離地)!講真,我自己都係網民啦,我認我會開啲account撐返自己㗎,自己做自己打手囉!」

幾年前Michelle已開始經營YouTube Channel,《衛食攻略》做得有聲有色。
幾年前Michelle已開始經營YouTube Channel,《衛食攻略》做得有聲有色。

一八年,正是Michelle入行十年的時候,拍過一條紀錄短片《紀錄.十年.衛詩雅》,當時的她,正面對事業低潮,片中Michelle提起父母時,兩行眼淚不停流,「嗰陣時仲係好低潮,爹哋媽咪好擔心,到依家其實佢哋都擔心,唔代表話曝光多咗、有咗提名就唔擔心,他們擔心嘅嘢唔同咗。其實我都想趁今次呢個訪問同佢哋講,其實你哋個女好叻㗎,唔使擔心,我由細到大都算堅強,我從來唔會喺佢哋面前喊。」

入行十六年,Michelle終憑《不日成婚2》獲提名金像獎「最佳女主角」。
入行十六年,Michelle終憑《不日成婚2》獲提名金像獎「最佳女主角」。

 

Michelle在上水太平邨長大,家有一姊一弟,很多人都說,家中排行決定了孩子的個性,夾在中間的孩子,多數都比較獨立。Michelle自小已很懂得為自己打算,為了安全感,她考了很多牌照,「我有車牌、船牌、潛水牌、救生員牌、鑽石鑑證、寵物美容、動物傳心術,連導遊牌都有,點解要考咁多牌呀?因為我冇安全感,我驚自己會失業,所以乜都讀咗先,將來冇工開、搵唔到工都有一技傍身。我細細個已經有呢個不安全感,如果幾日冇開工,我會覺得好浪費時間,一定要搵啲嘢做吓。」

whatsapp-image-2024-03-28-at-15-07-51-6

入行多年,圍繞Michelle身邊的朋友,大部分都是在影圈打滾,甚麼崗位都有,Michelle對每個崗位的工作都瞭如指掌,「我對電影幕後任何一個崗位都有興趣,除咗導演,我諗我一定唔會做導演,做導演太辛苦喇,同時間要兼顧嘅嘢太多,同埋要不斷幫人解決問題,我比較擅長製造問題,喺片場大小問題,第一時間就係煩個導演,我唔想做呢個職位,我覺得每個導演係有少少被虐狂,太辛苦啦!」

一七年擔正邱禮濤執導、夥拍黃秋生主演的電影《失眠》,Michelle戲中一人分飾悲慘孖生姊妹,角色造型恐怖血腥,不過,亦令Michelle跳出愛情片的局限。
一七年擔正邱禮濤執導、夥拍黃秋生主演的電影《失眠》,Michelle戲中一人分飾悲慘孖生姊妹,角色造型恐怖血腥,不過,亦令Michelle跳出愛情片的局限。

whatsapp-image-2024-03-28-at-15-07-51-7

說到最愛的崗位,演員才是首選,而每次接到新角色,Michelle都會花時間與角色「對話」,好似拍攝《失眠》時,她會分別用姊姊和妹妹的角度去寫日記,父母都已習慣了Michelle這些行徑。問到Michelle還有甚麼角色想演?她說最想演全CG(電腦合成影像)的電影,「得一塊綠布,所有嘢都靠自己幻想來演,應該很有挑戰;第二個呢,我覺得衛詩雅以前做得太多被害者,成日被傷害,好弱,我依家強壯咗,想做一啲大家姐或者傷害人嘅角色,唔想再被傷害。」

whatsapp-image-2024-03-28-at-15-07-51-1

十六歲還未加入英皇前,Michelle已經認識Mani霍汶希,當時Michelle為《Yes!》偶像雜誌做模特兒,她透露了一個小秘密,「當時Twins已經好紅,我相信係搞gimmick,話會加入新成員,Mani有提議過簽入英皇,其中一個可能性就係加入Twins,冇話一定嘅,而同一時間,我同細佬一齊casting《四葉草》,我中咗喎,第一次嘗試到演戲滋味,我就選擇咗演戲了,依家諗返,就算我想選擇入Twins,可能到試音的時候,他們就會知道我唱歌跳舞有幾差,點會俾我加入,哈哈!唱歌?我唔敢有興趣呀,我唱過一次㗎啦(與洪卓立合唱《很想和你在一起》),真係人生污點,如果網絡欺凌想傷害我的話,話我把聲好老牛、依家好老、個胸好細,呢啲都傷害唔到我,只要一播呢首歌出嚟,我自尊心就會跌到落谷底,求吓大家,唔好播!」

whatsapp-image-2024-03-28-at-15-07-52

最後問Michelle,名字常鬧出笑話,有沒有覺得被自己的名字拖累?她笑說︰「直頭係啦!當初公司唔想我叫做衛詩雅,就咁叫詩雅,諗住唔好撞衛詩(衛蘭胞妹),跟住Shiga(連詩雅)就出道喇,應該就唔好改,叫做衛詩雅,霸住先,哈哈!」

 

攝影(封面):Matt Yau
攝影(花絮)︰伍敏慧
形象︰Katy Tsa
化妝︰MW
髮型︰Wil Tam@ArtifyLab
服裝:TORY BURCH, ANTEPRIMA, SHIATZY CHEN

宋慧喬 朴寶劍 Wanna One
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹