在「Marvel」電影宇宙裏，最鍾意玩嘢的，肯定是保羅路德(Paul Rudd)飾演的蟻俠。三年前首集《蟻俠》裏，他得到超能力，可以隨意變大變小，搞到一班對手無晒符，像上集混戰中他突然變小，並利用Thomas玩具火車作為終極武器一幕，就夠晒出人意表兼爆笑。在即將上映的《蟻俠2：黃蜂女現身》裏，他當然繼續發揮抵死本色，用盡奇招對付敵人，不過似乎今集他不再一味變小，轉為玩鬥大，甚至與Dr Bill Foster鬥嘴都語帶相關玩鬥大。以下精選幾個「大場面」，睇吓又會唔會俾佢「大」到？
今集新英雄「黃蜂女」同樣有變大變小的能力，她的裝備甚至比蟻俠更勝一籌，備有雙翼，相反無翼的蟻俠只能繼續「搭乘」飛蟻代步。有份編劇的保羅路德笑言，為了不失氣勢，決定在一幕高速公路追車場面，將自己變巨人，用「滑浪式」的滑稽姿態趴在一架卡車上面，就算追唔到車，都足夠嚇窒對手。
這幕大概不是人人接受得到，甚至有人會覺得這隻巨型螞蟻比恐龍更恐怖。記得在上一集，蟻俠的其中一隻螞蟻戰友意外被放大，好多人估這隻螞蟻在蟻俠屋企住了下來，仲成為他女兒Cassie最疼愛的寵物。更重要是，不少人認為這隻螞蟻腳上「疑似」綁着警方的禁足儀器，很有可能代替被軟禁的蟻俠，讓他脫離警方視線秘密甩身。
蟻俠同Dr Bill Foster鬥嘴時自爆自己最「大」可以去到65呎，相信呢幕就係傳說中的巨人儀俠，佢變大時仲抵死狂笑，搞到海面波濤洶湧，雖然自己就玩得好興奮，不過船上的人就一啲都笑唔出，仲全部嚇到臉青，場面超級惹笑。想笑餐飽的你，記得要入場睇蟻俠點樣喪玩鬥大喇！
圖片來源: Marvel Studios、互聯網