馮德倫(Stephen)同吳彥祖(Daniel)近年主攻美劇界，一個攻幕後，一個做幕前，好似他們合作的武打劇《荒原》(Into the Badlands)拍到第三季依然備受好評，仲儲落一批喜愛武打的劇迷支持。日前，Netflix就宣布同Stephen合作新劇《Wu Assassins》，由佢出任監製同執導頭兩集，實行食住個武打熱，繼續俘虜劇迷！
早前有傳《荒原》第三季雖然仍受到不少好評，不過收視稍現下滑，令第四季的開拍計劃存在暗湧。不過，好在Daniel早已劇集同電影兩邊走，拍劇以外，亦參演過不少荷李活大片如《魔獸爭霸戰》、《人造天劫》同《盜墓者羅拉》等等，不愁沒演出機會。而Stephen就如前文提及，已經搵到好路數，同Netflix合作新劇《Wu Assassins》，此劇是一部融合異能元素的武打劇，由《突擊死亡塔》(The Raid Redemption)的印度武打巨星Iko Uwais，及《維京傳奇》(Vikings)女星Katheryn Winnick主演。Iko Uwais近年在荷李活極速冒起，他主演的《突擊死亡塔》在歐美大受好評，突破印尼片在國際影壇的成績，至於Katheryn Winnick就同Maggie Q合作過《尼基塔》(Nikita)，個樣靚得嚟又幾有型，仲識跆拳道。而Stephen亦安排曾喺《荒原》合作的男星Lewis Tan參演，唔知將來有無機會都安排Daniel客串一下呢？
劇集故事以三藩市唐人街為背景，講述Iko Uwais飾演的廚師被捲入一場源於遠古的正邪大戰，佢會挖掘一個古老謎團，並捉拿有異能的刺客，Lewis Tan則飾演殘忍聰明的犯罪集團大佬，至於Katheryn Winnick飾演的卧底警察，亦巧合地被捲入這場幫派戰爭。劇集預計在8月初開鏡，第一季故事共10集。
圖片來源：網上圖片