英國劍橋公爵夫人凱特(Kate Middleton)今年四月誕下路易小王子，專心休養數月後，日前終於「產後復出」重返王室成員的工作崗位，獨自前往探訪倫敦一間森林小學，成班小學生見到凱特興奮到不得了，跑去攬實她的腳，氹得凱特笑唔停。期間一個小女生同凱特的對話更意外被錄下來，令凱特獲外界大讚大方又有愛，非常得民心。
當日凱特一到埗，便被一群四至五歲的熱情小學生包圍，有一個小女生興奮得衝上前攬實凱特雙腳，其他小朋友見狀一齊衝前攬住唔放，氹得凱特笑到見牙唔見眼。其後，凱特與學生們一起在花園尋找小動物、種植盆裁、將落葉砌成王冠，又同小朋友一齊講故事，遇見扭計的小孩更主動抱抱對方，流露滿滿的母愛。活動中，四歲小女孩Lanwe跑過去問凱特：「點解佢哋不停影你？」凱特就牽起對方的手温柔地答：「佢哋係影你，因為你好特別。」氹得Lanwe心花怒放。這段對話在英國被廣傳，好多群眾都大讚凱特對答得體，對小朋友非常有愛心，仲話相信喬治小王子、夏洛特小公主及路易小王子在母親的照顧下都會是快樂小孩。當日凱特更被發現重穿用了十年的長靴，慳家又親民的作風讓民眾非常受落。
圖片來源：kensington palace@twitter、互聯網