去年泰片《出貓特攻隊》俘虜全港影迷，大破票房紀錄，仲令三位主角一夜爆紅，非常巴閉。今次，製作班底帶來另一話題作《大佬可以退貨嗎?》，演員班底更勁，雲集泰國影帝Sunny、泰國國民女神Yaya與韓國2PM成員Nichkhun，三位都係萬人迷自然矚目，而飾演「廢柴」大佬的Sunny就做代表，這兩天旋風式訪港做宣傳，一向出名鬼馬的他與本刊做訪問時，更鬼馬扮另一位港產影帝古天樂大講金句，仲忍唔住笑到趴低！
曾多次來港的Sunny對香港並不陌生，但今次是他首次來港宣傳電影，自言非常興奮。Sunny昨日先與導演維達也湯于容及女配角Ploymon出席首映，與大批影迷見面，遇見大批粉絲蜂擁上前合照亦有求必應，非常親民。今日受訪時，他自言為了這兩天的宣傳特地苦練廣東話，用廣東話打招呼已非常流利。沒想到他原來非常喜歡看港產片，更謂每次走在香港街道都會想起「古惑仔」電影系列，更認得今屆出爐金像影帝古天樂。適逢Sunny在戲中的職業是廣告人，打鐡趁熱，小編就讓他重演古天樂的經典廣告大講金句「輪胎能」，估唔到Sunny講得比廣東話流利，更實行玩盡佢自創動作扮駕駛，令全場忍唔住大笑，鬼馬表現同電影裡的如出一轍！
《大佬可以退貨嗎?》講述Sunny飾演的「廢柴」哥哥無論學業定工作都比妹妹(Yaya 飾)差一大截，自尊受創的他唯一反擊方法就是令妹妹「嫁唔出」，嚇窒她的每個男友。咁啱妹妹今次遇上Nichkhun飾演的筍盤，哥哥誓要搞亂妹妹好事，兄妹大戰一觸即發！電影將於6月21日上映。