仲未成功「食雞」？因為你缺少一位達到澤囝級數嘅神槍手隊友！
無綫電視劇《飛虎之潛行極戰》即將來到結局周，劇中一幕幕緊張的槍戰場面看得觀眾咬牙切齒，當中槍法神準嘅飛虎隊隊長高家朗（黃宗澤 飾演）更成為網民熱話，事關佢幾乎百發百中，真係一粒子彈都冇嘥！
家朗喺劇中唔單只head Shot殺敵人同恐怖分子掂，連點開槍唔會射死人嘅技巧都掌握得淋漓盡致。例如上星期播出既十九集，做緊臥底嘅家朗為左取得國斌信任，逼不得已下向佢前飛虎上司雷Sir開槍。但其實佢一早預料到會有呢一日出現，所以一早委託師父聶Sir（苗僑偉飾演）將神秘匙扣交給雷Sir，而匙扣裏面寫左將來佢嘅開槍位置同急救方法！最後，當然如佢預言所講，澤囝只係打中雷Sir第二同第三肋骨之間，沒有即時生命危險，放番肺部積血及時急救，終逃離鬼門關。
其實警察劇加入臥底元素並不罕見，但飛虎加臥底呢個組合都可能係第一次，無他嘅，臥底元素收得吖嗎。就好似近年嘅《潛行狙擊》、《使徒行者》都係最佳例子，收視一直高企，觀眾顯得非常受落。《潛行狙擊》入面既Laughing哥雖然最後還是死了，但當時既一股熱潮令呢部劇搬上大銀幕，推出左以Laughing哥為主角既電影版《變節》；《使徒行者》令觀眾由頭估到尾，估邊個至喺臥底，當時既熱潮仲令呢套劇橫掃多項最佳電視劇集獎，劇中多名男女主角和配角在本地、海外都獲得多個獎項。
警察臥底劇之所以咁深入民心，係因為戲中臥底既掙扎、壓抑、迷失，當深入敵陣愈耐，愈容易忘記當初既臥底身分，甚至喺未完成任務之前，就已經白白犧牲送命，所以一班觀眾都睇得好肉緊。嚟緊《飛虎之潛行極戰》將會開拍第二輯，期待可以再睇到多啲槍戰刺激場面啦！