《復仇者聯盟3》上畫近一個月，討論話題仍然不斷，見到咁多位英雄化成灰燼，唔少粉絲都大膽預測《復仇4》劇情仲可以點繼續落去。而出名創意爆棚嘅香港網民諗到個完美解決方案，一於整個新英雄出嚟同魁隆（Thanos）決一死戰，而人選就係擁有第7粒無限寶石嘅家燕姐。佢哋仲認真到將魁隆同幻視對峙片段二次創作成家燕姐版，但最令人驚喜嘅係連家燕姐都認真玩埋一份，仲出埋海報揚言要保護地球呢！
魁隆同幻視對峙片段被網民二次創作成家燕姐版
家燕姐今次反應真係超快，剛成為網絡討論熱話就即刻出圖回應，實行被繼續抽水，不如先自抽呃Like。網民睇完蘭茜隊長張海報都顯得非常受落，仲話笑到標眼水，唔乖乖派Like畀家燕媽媽都唔得掂，而家燕姐早前接受傳媒訪問時亦表示歡迎漫威找她拍攝《復仇4》。
家燕媽媽：「我會全力保護池力共鎮，你哋企埋一邊休息啦。」（設計對白）
若果蘭茜隊長真係可以客串《復仇4》或喺片尾彩蛋露個面，都咪話唔有趣，但唔知蘭茜隊長到時會有咩技能？唔知係十字步死光，定係唏呀唏呀唏音波功呢？
圖片來源：互聯網、薛家燕、Cult片介紹返@Facebook