陳蕾早前宣布3月舉行一連三場《念》演唱會，三場門票一開售即秒爆，一票難求。今日（22日）大會宣布再加開一場（3月2日）作為首場！門票於今個星期五 （1月26日）公開發售！對於首次在紅館舉行演唱會，一開三場即秒爆，還再加開，陳蕾直言可能是所謂天意，「本來真係冇期，得三場，但運氣不錯啦，突然又收到通知話有時間比到我哋，咁同公司研究過之後，又唔想俾自己咁大壓力，所以決定加開多一場。」
問到陳蕾是否知道很多歌迷仍撲不到飛，黃牛飛即開天殺價？她說：「我真係唔係好知出面情況，咁今次可以加開，希望令大家有再多啲空間去買到我個演唱會。確實喺內部認購時，我張海報都仲未出街，就已經爆咗！我好多朋友喺我出咗演唱會poster後，先嚟問我訂飛，我一張飛都幫唔到佢哋，依家加多場，對我嚟講某程度上都係好事，我終於可以有少少飛俾自己嘅朋友，可以睇到我嘅第一次紅館演唱會。」
雖然三月才開騷，但陳蕾表示已經好努力去閉關，全副精神都放在演唱會上，無論心情、體能、表演內容，都進行得如火如荼，但演唱會製作就不能透露，她笑說：「入嚟睇啦，嚟到咪知囉！祝大家26號買到飛！」