陳煒同楊千嬅、朱晨麗及周柏豪拍完《多功能老婆》後，友誼升級，二號係朱晨麗生日，一班人食飯慶祝，仲特別拍咗條搞笑片幫陳煒拉票！
今年陳煒憑《宮心計2深宮計》中的太平公主一角入圍爭女主角，片中陳煒當然做太平公主，千嬅就化身宮女春嬌，朱晨麗就做宮女春朱，而周柏豪就做太監小鮮肉spring pocket！
千嬅演嘅春嬌問太平公主︰「想食乜嘢？」但就被太平公主陳煒話佢︰「春嬌我教咗你，行禮係咁行嘅咩？」輪到春朱出場，就直撞太平公主，被公主鬧佢︰「撞死我啦春朱，你以為我係皇帝，你色誘我係咪呀！冇心情食嘢呀！」
陳煒好戲扮嬲嬲豬，千嬅召喚太監小鮮肉周柏豪，陳煒問佢叫乜名，佢口窒窒話︰「我叫春pocket。」但千嬅搶先講︰「spring pocket。」講完大家笑到死死吓，千嬅問周柏豪搞乜？周柏豪話︰「搞緊出面啲人投你（陳煒）票囉，投《萬千星輝》…」然後千嬅同朱晨麗搶住話︰「投最佳女主角，係咪。」周柏豪仲話︰「原來我都有份。」千嬅已經笑到趴喺陳煒身上，之後陳煒開心攬住兩位好姊妹，佢仲喺ig話多謝佢哋友情客串，幫佢拉票！
圖片來源：陳煒、朱晨麗@Instagram