蔡思貝及何廣沛今日為劇集《你好，我的大夫》進行宣傳，思貝父母連同愛犬現身撐埸。兩位主角首次合作，思貝表示享受演不同角色，「我地同期出道，但就真係第一次合作，發覺佢係一位好細心嘅對手，而且又會控制現場環境，以前演慣比較硬朗角色，所以今次嘗試演溫柔的角色，真係好開心，演得好舒服，剛開始拍時有另一番享受。（學中醫手法？）因為我平時有睇慣中醫，試過不同嘅中醫，所以知道要拍呢類題材好興奮，可以將我咁多年睇中醫嘅經驗一展所長，拍劇時每當落針，就攞返平時俾人針的感覺就可以。」思貝於旅遊節目《貝遊歐洲》中被網民指太嘈，「大家嘅批評都正常嘅，因為今次自己一個拍旅遊節目，點都要講說話介紹，我好想將旅遊時最好嘅嘢介紹俾觀眾。」
何廣沛大讚思貝擁有一顆少女心，「以前睇劇覺得佢好硬朗及爽朗，但原來佢有一顆少女心，真係估唔到，佢好鍾意粉紅色物品。」
