荷李活大隻佬狄維莊遜(Dwayne Johnson)為了新片《高凶浩劫》(Skysraper)，連日在香港進行宣傳活動。今日他率領一眾演員，包括女主角莉芙金寶(Neve Campbell)、台灣「天王嫂」昆淩、華裔演員文峰(Byron Mann)、黃經漢(Chin Han)、導演羅遜馬素費巴(Rawson Marshall Thurber)及監製齊齊到沙田出席粉絲見面會，同一眾香港影迷近距離接觸！
狄維莊遜的人氣強勁，早在活動開始前，已經有過千粉絲迫爆商場。當他現身紅地毯，全場歡呼聲雷動，場面極為墟冚，狄維莊遜表現非常親民，在紅地毯上主動與影迷自拍及簽名。其後大會司儀Do Do姐邀請狄維莊遜及一眾台前幕後上台傾偈，狄維莊遜非常識做，一上台即刻自拍，影低全場粉絲的熱情反應，仲話好多謝香港粉絲的支持，他表示之前到過許多亞洲地方，但一直未訪過香港，所以好開心今次終於有機會同香港粉絲見面，仲話好希望下次再有機會嚟香港。
為預祝《高凶浩劫》票房大賣，大會安排舞龍舞獅表演，狄維莊遜獲邀為舞獅點睛，又幫手舉起舞龍的「龍珠」，雖然粒龍珠都頗有份量，但觀乎狄維莊遜的強大手瓜，就知難唔到佢。其間有粉絲大呼「Mr. President」，迎合狄維莊遜早前聲稱有意競選下任美國總統的言論，逗得狄維莊遜笑到見牙唔見眼，仲多次主動向台下粉絲揮手，大概在場粉絲都好想佢快啲再嚟香港！