世界盃開鑼喇！無論你係球迷，抑或平時無留意足球，都相信你一定聽過有關世界盃嘅主題曲。而今年世界杯中文主題曲《我們的夢》就由譚校長親自作曲，佢仲話自己用左四日時間，聽左成百首東歐民族歌先寫到呢首歌出嚟，但估唔到首歌一出街網民就表示呢首歌太懷舊似山歌，仲可以配埋十字步跳大媽舞。不過，各花入各眼，可能喺部分讀者眼中呢首係金曲呢！
![Mayday五月天 [由我們主宰 The World Is Ours] MV官方完整版 - 2014世界盃足球賽 可口可樂主題曲 Coca-Cola 2014 FIFA World Cup Theme](https://i.ytimg.com/vi/W-vRKek-K-8/0.jpg)
筆者相信每位球迷心目中都應該有一首世界盃主題曲，每次開波完都要播一播，熱一熱身，準備好心情一陣為自己隊波打氣。近二十年嚟亦有唔同明星歌手唱嘅主題曲，例如１９９０年有校長譚詠麟主唱嘅《理想與和平》、１９９４年有黎明主唱既《獻出激情》、２０１０年張學友同張靚穎主唱既《旗開得勝》、２０１４年五月天主唱既《由我們主宰》等等，但要數最大熱既世界盃主題曲，一定係足球在迷李克勤唱嘅《球迷奇遇記》、《Victory》同《我著十號》！
《球迷奇遇記》係１９９８年既世界盃主題曲，歌詞由李克勤親自填寫。歌中除了「起來！起來！起來！起來！今晚大家不想去街！」呢幾句唱到街知巷聞，歌詞裏面仲穿插左唔少同球星有關嘅生鬼歌詞，例如：「朗拿度個光頭就好可愛」、「施丹都有個地中海」、「碧咸同辣妹就真心相愛」等等，聽落真係非常過癮，仲令人熱血沸騰，想即刻起身換鞋落場踢波。
講起曼聯超級粉絲李克勤，唔可以唔提２００５年「送禮勤」事件。當年英格蘭足球隊曼聯訪港進行友誼賽，擔任曼聯中文網頁大使既克勤想一盡地主之誼，拿着苦心製作嘅紀念品送俾曼聯，克勤一心認為禮物會被擺放喺英國既曼聯博物館，點知曼聯離開球場後，克勤既紀念品被當成垃圾，靜悄悄地安放喺更衣室內，事後佢笑話：「傷心，不過冇辦法，等如你愛一個人，人哋唔愛你，但我都會繼續愛，反而會檢討吓自己送嘅禮物。」
圖片來源：李克勤@Facebook