荷里活不停玩重拍，連拍過唔少外傳嘅《鐵血戰士》（Predator）都有份，新片《鐵血戰士：血獸進化》（The Predator） 9 月 13 日殺到香港，剛剛發放預告片，今次因為個細路打開件玩具，呼喚血獸太空船來到地球，帶來比以往一味打打打的續集同外傳多啲新意，歸功於80年代已創作電影《轟天炮》系列的《鐵甲奇俠3》導演Shane Black。

從《鐵血戰士：血獸進化》預告中所見，一位小孩好似從網購收到一盒大玩具，佢打開包裹並將內藏類似玩具的控制器啟動，原來那是血獸太空船的呼叫器，頓時令太空船來到地球。

而今回登陸地球的鐵血戰士已經比以前的更為強壯、聰明、致命，並學會了利用其他物種的 DNA 為自己的基因進行升級。由一群退伍軍人同科學家組成小分隊作為先鋒隊，保衛地球家園，奮起反抗血獸。

好多影迷好期待全新《鐵血戰士》電影，都覺得導演Shane Black令奪片注入咗新意，80年代已入行的Shane，除咗係電影《轟天炮》系列編劇，仲有參演過舊版《鐵血戰士》，仲有份編劇，所以對呢個系列有情意結。佢拍好多片都鍾意加個重要嘅小朋友角色，好似《Last Action Hero》、《鐵甲奇俠3》到《黐筋雙响炮》，以至《鐵血戰士：血獸進化》都係，令《鐵血戰士》唔再一味只係大隻佬打怪獸，外國報道指呢套係《鐵血戰士》reboot，但Shane就話其實都算係系列續集，因為故事背景發生在原版之後。

除咗《鐵血戰士》外，荷里活仲有好多片係reboot，明年就有《神探俏嬌娃》、《再生俠》（Spawn），之後仲有《猛鬼街》、《烏鴉》、《星河戰隊》，甚至阿諾舒華辛力加另一套舊作《獨闖龍潭》、經典片《窈窕淑女》、《疤面煞星》、《天使追魂》、《美式殺人狂》同日本片《大逃殺》，荷里活都唔放過reboot。

撰文：安東尼奧

圖片來源：互聯網